Akademiya Ma Musicê mohra xwe li bin xebatek din a muzîka Kurdî da û pirtûka “Repertuara Stranbêjiyê” çap kir. 50 stranên zarokan û 60 stranên gelêrî, koda QR û notayên stranan di pirtûkê de cih digirin. Şêrko Kanîwar diyar kir ku her kes dikare sûdê ji pirtûkê werbigire û got: “Ev şakara ber serê her Kurdekî ye.” “Repertuara Stranbêjiyê” çap kir û mohra xwe li bin xebatek hêja û dewlemend a muzîka kurdî da. Pirtûk ji aliyê Weşanên Mayê ve derçûye. Pirtûk ji hêla xebatkarên Ma Musicê ve hatiye amadekirin û edîtoriya wê Ramin Rabiei kiriye û hunermend Şêrko Kanîwar jî Derhêneriya Weşanê kiriye.
Gelek hunermend û stranbêjan jî piştevaniya amadekirina pirtûkê kirin e. Yek bi yek malovaniya wan hatiye kirin. Pirtûk ji 232 rûpelan pêk tê. Peyvên stranê û notaya stranê di rûpelên miqabilî hev de hatine nivîsandin. Taybetmendiya vê pirtûkê ango stranên hatine nivîsandin ew e ku QR Kodu ango Koda QR li ber hatiye danîn. Guhdarek stranê dema Koda QRê bixwîne rasterast di YouTube de diçe guhdarî û temaşekirina stranê.
Xurtkirina bîra stranên Kurdî
Pirtûk beriya 8’emîn Fuara Pirtûkan a Amedê bi çend rojan der çû û niha li ser standa Weşanên Ma Musicê a fuarê li benda xwîner û hezkiriyên muzîka kurdî ye. Koordînatorê Akademiya Ma Musicê Şêrko Kanîwar derheqê pirtûkê de axivî û bi bîr xist ku beriya vê pirtûkê dema ew li Konservatura Aram Tîgran bûn, pirtûka bi navê “Stranbêjiyê û çanda dengbêjiyê” çap kiribûn û ji bo dersa ango perwerdehiya zarokan a stranbêjiyê wê çaxê amade kiribû. Şêrko Kanîwar anî ziman ku piştî qeyûman, Ma Music ava kirin û hemû xebatên wan ketin bin banê Mayê.
Şêrko Kanîwar destnîşan kir ku pêdivî pê hebû ku pirtûk bê revîzekirin û got:“Me navê wê guhert. Me ji havînê ve heta niha stran û notayên wan ji bo pirtûkê amade dikir. Cara din me pirtûkê kategorîze nekiribû, lê me vê carê pirtûkê kategorîze kir. Beşek bi taybetî stranên ji bo zarokan hatine amadekirin. Beşek din jî stranên gelêrî ne. 50 stranên zarokan e, 60 heb stranên gelêrî ne. Bi giştî 110 stranên têde hene. Rasterast ji bo perwerdehiya zarokan dikare sûd jê bê girtin. Lê belê helbet ne tenê ji bo zarokan e. Ji bo perwerdekarên muzîkê ye. Ji bo perwerdekarên muzîkê ye, ji bo hemû hemû perwerdekarên muzîka kurdî ye. Her stran li aliyekî rûpelê peyvên wê û çavkaniya wê heye, li alyekî din ê rûpelê jî nota stranê heye. Di bin stranê de jî QR Kodu heye. Ji bo ku ev pirtûk ji kesên muzîkjen, amûrjen re bibe referans. Pirtûka me kar hêsan kiriye. Armanca vê pirtûkê û kodên QR xurtkirina bîra stranbêjiyê û stranên Kurdî ye.”
Pirtûk bi zaravayan xemilî ye
Şêrko Kanîwar da zanîn ku di pirtûkê de bi zaravayên Kurmancî, Zazakî, Soranî stran hene û stranek lorî ya zarokan tê de heye. Şêrko Kanîwar anî ziman ku ev pirtûk bi vê naverokê û konseptê ji pirtûka wan a berê pirr berfirehtir e û got:“Vê carê stranek me ya Êzidî Şerfedîn tê de heye. Strana muzîka Kurdên me yên Elewî semah tê de heye. Wê xeleka duyemîn a vê pirtûkê jî bê amadekirin. Em ê hewl bidin rengên hemû beşên Kurdistanê û taybetmendiyên muzîka Kurdî di beşa duyemîn a pirtûkê de bicih bikin. Divê pirtûk bigihîje hemû malên Kurdan. Ne tenê ji bo zarokan e. Divê şakara ber serê her kurdekî be.” Şêrko Kanîwar diyar kir ku hemû xebatkarên Mayê di xebata pirtûkê de cih girtin e û got “Me têr nekiriye, ji bo deşîfrasyonkirina stranan malbatên şagirtên me jî piştgiriya me kirin. Ev pirtûk encama tecrûbeyên me yên Ma Musicê ye.”
Şêrko Kanîwar destnîşan kir ku 7’ê Kanûnê saet di şeşan de li Salona Firatê ya fuarê wê lansmana pirtûkê bê kirin.
AW/BÎLAL GUNDEM
