- Li Eyaleta Vîrjînyayê ya Emerîka, li bajarê Manassas Park bi piştgiriya şaredariyê meha Adarê wekî “Meha Mîrasa Kurdî” hate îlankirin. Bi vî awayî ew ê hewl bidin vê mehê bala xelkê bibin ser çand û berxwedana gelê Kurd.
Li eyaleta Virjînyayê ya Dewletên Yekbûyî yên Amerîkayê, ragihandina meha Adarê wekî "Meha Mîrasa Kurdî" (Kurdish Heritage Month) di rojên dawî de di nav civaka Kurd û medyaya navneteweyî de deng veda. Lê belê divê em rastiyekê zelal bikin: Ev biryar ne ji bo tevahiya eyaletê ye tenê ji bo bajarokê piçûk ê Manassas Park e ku girêdayî eyaletê ye. Di Meclisa Giştî ya Virjînyayê de qanûn an biryareke wiha tune ye; ev ragihandin bi temamî li ser asta herêmî, ji aliyê rêveberiya bajar ve hatiye dayîn.
Di 17ê Sibata 2026an de Meclisa Rêvebir a Bajarê Manassas Park (Governing Body), bi îmzeya Şaredar Alanna Mensing biryareke fermî weşand. Ev biryar meha Adarê ya 2026an wekî "Meha Mîrasa Kurdî" ragihand û di heman demê de piştgiriyeke xurt ji bo gelê Kurd li Rojavayê Kurdistanê nîşan da. Biryar bi pêşengiya rêxistina Parêzvanên Kurd ên Amerîkayê (American Kurdish Advocates – AKA) hate pêşniyarkirin û di civîna meclisê de hate pêşkêşkirin. Nûnerên AKA û endamên civaka Kurd a li bajar amade bûn û spasiya şaredar û meclisê kirin.
Piştgiriya çandî û siyasî
Di nivîsa biryarê de sedemên sereke wiha têne eşkerekirin; “Êş û zehmetiyên şerê Sûriyeyê: Ji destpêka şerê navxweyî yê Sûriyeyê ve, gelê Kurd bi koçberbûn, windakirina can û gefên komên tundrew re rû bi rû maye. Biryar bi awayekî zelal dibêje: Gelê Kurd di têkoşîna li dijî terorê de roleke girîng lîstiye û di heman demê de jiyaneke aştiyane ya hevbeş pêş xistiye. Rewşa niha ya bêîstîqrar li Sûriyeyê: Piştî hilweşîna rejîma Esed di dawiya 2024an de, nediyarbûn û aloziyên herêmî berdewam in û sivîlên Kurd di xetereyê de ne. Biryar piştgiriya daxwazên Kurdan dike: hemwelatiyatiya wekhev, parastina mafên mirovan, naskirina çandî û jiyaneke aştiyane di Sûriyeyeke aram de.”
Rola Kurdan di têkbirina DAIŞ’ê de
Ev biryar rola Kurdan di têkoşîna li dijî DAIŞê de bi bîr tîne û bi awayekî ne rasterast spasiya Amerîkayê ji gelê Kurd re nîşan dide. Bajarê Manassas Park bi fermî piştgiriya "ewlekarî, rûmet, wekhevî û ewlehiya gelê Kurd" dike û bang li hevkariyên dîplomatîk, alîkariyên mirovahî, parastina sivîlan û diyaloga adil dike da ku çareseriyeke dadperwer û mayînde were bidestxistin.
Meha Adarê di çanda Kurdî de girîng e, ji ber ku Newroz a 21’ê Adarê sembola biharê, nûbûnê û berxwedanê ye. Li bajarên din ên Amerîkayê (wekî Nashville û New York) jî meha Adarê wekî "Meha MîrasaKurdî" tê pîrozkirin; biryara Manassas Park li vê kevneşopiyê tê. Ev biryar ne tenê pîrozbahiyeke çandî ye; ew peyameke siyasî ya piştgiriyê ye li hemberî krîza niha li Sûriyeyê.
Çima tenê Manassas Park?
Manassas Park bajarokek piçûk e li bakurê Virjînyayê, nêzî Washington D.C. Li vir nifûseke mezin a Kurdî tune ye, lê diasporaya Kurd li seranserê Amerîkayê (bi taybetî yên ji Sûriye û Iraqê) lobiyeke çalak dike. Rêxistinên wekî American Kurdish Advocates bi kampanyayên "Save the Kurds" rêveberiyên herêmî agahdar dikin. Ev biryar wekî berdewamiya ragihandinên berê (mîna ya Şaredarê Nashville di 2022an de) tê dîtin. Herwiha, bandora hunermendê Kurd Lokman Ahmad ku li bajar pêşangeh vekiriye û têkoşîna Kurdan bi hunerê ragihandiye jî di vê biryarê de roleke girîng lîstiye.
Sembolîk e lê peyameke kûr jî heye
Ev cure ragihandinên herêmî li Amerîkayê ji bo naskirina komên etnîkî gelekî belav in mîna Meha Dîroka Reş an Meha Mîrateya Latînî. Biryara Manassas Park sembolîk e lê peyameke girîng dide: Gelê Kurd ne tenê ye; diasporaya Kurd li Amerîkayê hem mîrasa xwe pîroz dike û hem jî mafê têkoşînê li welatê xwe radixe ber çavên cîhanê.
Di meha Adarê ya 2026’an de tê plankirin ku li Manassas Park çalakiyên taybet bên lidarxistin. Ji bo civaka Kurd ev hem serbilindî ye û hem jî çavkaniya hêviyê ye. Hêj ji bo tevahiya eyaleta Virjînyayê biryareke wiha tune ye, lê serkeftinên herêmî dikarin di demeke kurt de bandoreke firehtir bikin.
Axir ragihandina Manassas Park a meha Adarê wekî "Meha Mîrasa Kurdî", ne tenê nirxdayîna cudahiya çandî ya bajarekî piçûk e; ew dengekî piştgiriyê ye ku li Amerîkayê ji bo zehmetiyên gelê Kurd li Sûriyeyê radibe. Di ronahiya Newrozê de ev meh dê bibe bîranînek ji bo daxwaza aştî û wekheviyê.
NAVENDA NÛÇEYAN
