QSD gelên li Sûriyeyê diparêze

Mehmûd Hebîb bal bir ser rola QSD'ê ya li  Sûriyeyê û wiha got:"QSD ku ji destpêka damezrandina xwe di sala 2015’an ve heta niha bi çeteyên dagirkeriya Tirk re şer dike, bi berdewamî gelên Sûriyeyê diparêze."

Berdevkê Hêzên El Şimal El Dîmokratî, Mehmûd Hebîb têkildarî destwerdana Tirkiyeyê ya di karûbarên Sûriyeyê de û hewlên wê yên ji bo dagirkirina Sûriyeyê, têkbirina tevgera şoreşgerî û piştgiriya komên çeteyan axivî.

Di 30’ê Gulana 2017’an de Tirkiyeyê komên çete yên rasterast û eşkere girêdayî wê ava kir. Hewleke mezin da ku ciwanên Sûriyeyê bixapîne û wan bike çete û kujer. Van koman navên ku girêdana wan bi dewleta Tirk û projeya wê ya Osmanî re piştrast dikir li xwe kirin, mîna çeteyên "Sultan Silêman Şah", "Sultan Murad" û "Sultan Melek Şah". Piraniya wan di lîsteyên terorê yên navneteweyî de cih girtin.

Mehmûd Hebîb diyar kir "Artêşa Niştimanî" li şûna hêzên şoreşger ên ku ji destpêka sala 2013'an heta destpêka sala 2015'an hatin hilweşandin, ava bû. Hebîb wiha pêde çû:  "Di wê pêvajoyê de bi dehan komên şoreşger hatin tunekirin, ji ber ku nexwestin di bin çavdêriya îstîxbaratên Tirk de kar bikin, ne jî tevlî komên çekdar ên îslamî yên weke Ehrar El Şam bibin, lewma ew kom hatin tunekirin."Mehmûd Hebîb her wiha bal kişand ser sûcên çeteyên dewleta Tirk a dagirker a li dijî gelê Bakur û Rojhilatê Sûriyeyê, bi taybet piştî ku Hêzên Sûriyeya Demokratîk û desthilata Şamê di 10’ê Adarê de li hev kirin û diyar kir ku çeteyeyan dest ji komkujiyan bernedan, ji ber ku li gorî fermanên dagirkeriya Tirk tevdigerin.

Mehmûd Hebîb destnîşan kir ku aloziya li Sûriyeyê û belavbûna komên çete û tundrew, rola Hêzên Sûriyeya Demokratîk (QSD) radixe ber çavan, ku ji destpêka damezrandina xwe di sala 2015’an ve heta niha bi çeteyên dagirkeriya Tirk re şer dike û bi berdewamî gelên Sûriyeyê diparêze. 

ANHA/TEBQA