Pîrozbahiyên 4'ê Nîsanê

Li Bakur û Rojavayê Kurdistanê bi munasebeta 4'ê Nîsanê roja rojbûna Rêberê Gelê Kurd Abdullah Ocalan gelek çalakî hatin lidarxistin. 

Ji bo pîrozkirina 76’emîn rojbûna Rêberê Gelê Kurd Abdullah Ocalan hem li Bakur hem jî li Rojavayê Kurdistanê bi dirûşma "Bijî Serok Apo" gelek çalakî hatin lidarxistin. Di çalakiyên bi girseyî de gelê kurd bend hilweşandin û azadiya Rêber Apo xwestin. 

Riha

Meşvanên Amara ku heta Xelfetiyê meşiyan, bi berxwedanê bersiv dan astengiya polîsan û astengî derbas kirin. 

Meşa ku ji aliyê Meclîsa Ciwanan a Partiya Wekhevî û Demokrasiyê (DEM Partî) ve bi dirûşma “Em bi civaka demokratîk ber bi azadiyê ve dimeşin” hat organîzekirin, gihişt ber deriyê navçeya Xelfetî ya Rihayê. Polîsan xwest meşvan nekevin navçeyê. Lê belê meşvanên Amara li hemberî van astengiyan li ber xwe dan û astengî derbas kirin. Li ser vê yekê polîsan bi gaza bîberê êrîşî meşvanan kir.

Li aliyê din ne tenê meşa Amarayê ji gelek bajaran jî ciwanên ku hatin berxwedana xwe dewam kirin.

Bi pêşengiya jinan meş 

Gel bi pêşengiya jinan ji bo pîrozkirina 76’emîn rojbûna Rêberê Gelê Kurd Abdullah Ocalan ber bi Amarayê ve meşiyan.

Ciwan, jin û gelek kes bi wesîleya 76'emîn Rojbûna Rêberê Gelê Kurd Abdullah Ocalan li Parka 4'ê Nîsanê ya navçeya Xelfetî ya Rihayê li hev civiyan û bi dirûşmeyên "Rojbuna te pîroz be ey Serok Apo" û "Bijî Serok Apo" ber bi Amarayê ve meşiyan.

Şêniyên Bakur û Rojhilatê Sûriyeyê û bajarê Helebê bi çalakiyan roja 4'ê Nîsanê rojbûna Rêberê Gelê Kurd Abdullah Ocalan pîroz kirin.

Tirbespiyê

Li bajarê Tirbespiyê bi beşdarbûna endamên saziyên civaka sivîl û şêniyên bajêr, li goristana şehîd Dilşêr li gundê Digirê, nêzî 70 darên cuda hatin çandin.Di heman demê de li parka şehîde Zekiya ya li bajêr jî 20 dar hatin çandin.

Qamişlo

Kongra Star bi boneya rojbûna Rêberê Gelê Kurd Abdullah Ocalan li hola Melekiyê ya li bajarê Qamişlo civînek lidarxistin.

Bi dehan şêniyên bajarê Qamişlo û Nûnerên ji Rêveberiya Xweser ya Kantona Cizîrê beşdarî civînê bûn.

Amûdê

Şêniyên bajarê Amûdê û bajarokê Sinceqa Sadûn 35 dar li "Baxçeyê Rêbertî" çandin û dilsoziya xwe ya ji bo  Abdullah Ocalan anîn ziman. Her wiha li Akademiya Malbatên Şehîdan a Amûdê jî 15 dar çandin.

Til Hemîs

Di heman çarçoveyê de şêniyên bajarê Tel Himîsê û gundên derdora wê meşek lidarxistin. Di meşa ku li pêşiya meclîsa bajêr dest pê kir beşdaran wêneyên Abdullah Ocalan û alên Hêzên Sûriyeya Demokratîk hildan û dirûşmên "Bijî berxwedana Rêberê Gelê Kurd Abdullah Ocalan" û "Bijî berxwedana Hêzên Sûriyeya Demokratîk" berz kirin. Meş bi qîrîna dirûşmên "Bijî berxwedana Rêber Abdullah Ocalan" bi dawî bû.

NAVENDA NÛÇEYAN