Parêzerê Nelson Mandela: Ocalan fersendek da

Ji parêzerên Mandela Kisten Govender, destnîşan kir ku bêyî azadiya fizîkî çêbibe Abdullah Ocalan banga bidawîkirina têkoşîna çekdarî kiriye û got Ocalan firsendeke mezin daye Erdogan. Ger vê firsendê nenirxîne dê heya dawiyê winda bike." 

Banga Rêberê Gelê Kurd Abdullah Ocalan a Aştî û Civaka Demokratîk ku di 27'ê Sibatê de kir, ji hêla gelek derdorên civakî û navneteweyî ve tê nirxandin û piştgiriya wê tê kirin. Têkoşîna demdirêj a Abdullah Ocalan bi ya rêberê Afrîkaya Başûr Nelson Mandela tê danberhevkirin. Her du kesayet bi têkoşîna xwe ya di girtîgehê de û nexşerêyên ku ji bo çareseriyê pêşkêş kirine balê dikişînin. 

Parêzerê Nelson Mandela û her wiha endama Komeleya Navneteweyî ya Hiqûqnasên li dijî Tecrîdê Kisten Govender, li ser vê yekê axivî.  

Govender bi bîr xist ku Abdullah Ocalan û Nelson Mandela beşeke mezin ji jiyana xwe di zindanan de derbas kirine û got: "Her du jî 'şervanên azadiyê' ne. Rêveberên ku ew li dijî wan têkoşiyan, wan wekî 'terorîst' bi nav kirin. Têkoşîna Mandela nisbeten hêsantir bû ji ber ku ew li dijî rejîmeke hindikahî bû. Mandela têkoşîna gelan ji bo diyarkirina çarenûsa xwe girîng didît. Ji bo naskirina vê têkoşînê li dijî dewleta Tirkiyeyê divê arguman werin pêşkêşkirin." 

Govender diyar kir ku têkoşîna Abdullah Ocalan dişibe ya Mandela û got: "Ocalan dê ji bo qenciya gelên tirk û kurd canê xwe bide, lê ew ê ji edaletê tawîzê nede. Wî tevahiya jiyana xwe ji bo vê pêvajoyê terxan kiriye. Ji ber ku ew şervanekî azadiyê ye, ew ê ji vê yekê paşve gav neavêje." 

Govender anî ziman ku dê zexta navneteweyî bike ku Tirkiye biryarên DMME'yê û biryara der barê "mafê hêviyê" d epêk bîne.   

Govender destnîşan kir ku bêyî azadiya fizîkî çêbibe Abdullah Ocalan banga bidawîkirina têkoşîna çekdarî kiriye û got ku ev bang kiriye ku Erdogan bi helwesteke birûmet re rû bi rû bimîne. Govender bilêv kir ku Ocalan firsendeke mezin daye Erdogan û got: "Ger vê firsendê nenirxîne dê heya dawiyê winda bike."  

MA / NAVENDA NÛÇEYAN / HÎVDA ÇELEBÎ