NY bi êrîşên Îranê dicive

Îsraîlê bi rojeva êrişa Îranê banga civîna lezgîn li Konseya Ewlehiyê ya NY’ê kir. Konseyê ragihand ku wê îro li gorî saeta DYE’yê 16.00’an bicive. 

Nûnerê Daîmî yê Îsraîlê yê Neteweyên Yekbûyî (NY) Gilad Erdan diyar kir bi rojeva êrişên hewayî yên Îranê banga civîna lezgîn li Konseya Ewlehiyê ya NY’ê kiriye. 

Êrîşên Îranê teror e

Erdan, li ser hesaba xwe ya X’ê daxuyanî da û da zanîn ku ji bo civîna lezgîn a Konseya Ewlehiyê ya NY’yê, ji Serokê Demê yê Konseyê re name şandiye. Di daxuyaniyê de Erdan ev tişt anî ziman: “Min xwest ku konsey bi lezgînî bicive, êrişên Îranê yên li dijî Îsraîlê bi awayeke teqez şermezar bike û Artêşa Mihafizên Şoreşê weke rêxistina terorê qebûl bike.” Erdan, destnîşan kir êrişên Îranê “ji bo aştiya cîhanê gefeke eşkere ye” û diyar kir ku divê Konseya Ewlehiyê ya NY’yê li dijî Îranê bi hemû amûrên xwe bikeve nava liv û tevgerê. 

Konseya Ewlehiyê dicive

Piştî bangawaziyê, Konseya Ewlehiyê ya NY’ê jî daxuyanî da û da zanîn ku biryar dane ku di roja yekşemê de bi rojeva êrişên Îranê li gorî saeta DYE’yê di 16.00’an bicivin.  

Mafê bersivdanê

Artêşa Mihafizên Şoreşê ya Îranê jî ragihand ku heke DYE piştgiriyê bide êrişeke li dijî Îranê yan jî tev li êrişan bibe, wê Hêzên Çekdar ên Îranê bertekeke “Bibiryar û ya ku poşman bike” nîşan bide. Di daxuyaniya duyemîn a Artêşa Mihafizên Şoreşê de hate gotin wan li dijî êrişa Îsraîlê ya li dijî konsolosxaneya li Şamê, di çarçoveya xala 51’emîn a Peymana NY’ê de mafê xwe ya rewa yê bersivdayînê bi kar aniye û noqteyên leşkerî yên Îsraîlê hedef girtine.   

Bila erîş rawestin

Serokê Lijneya Giştî ya NY’ê Dennis Francis jî têkildarî êrişa hewayî ya Îranê ya li dijî Îsraîlê, banga îtîdalê li hemû aliyan kir û xwest bûyer rê li ber şerekî herêmî veneke.  

Sekreterê Giştî yê NY’ê Antonio Guterres jî bi daxuyaniyeke nivîskî banga bidawîkirina êrişan ên li herêmê kir. Guterres, got ku ne Rojhilata Navîn ne jî cîhan nikare şerekî nû ragire. 

MA