Nobeta Edaletî qedîyaye: Wa hiqûq bêro ramitene

• Serekwekîlê Grûpa HDPyî Sarûhan Orûçî dîyar kerd ke, tecrîd leteyê polîtîkayê vera destkewteyanê Kurdan o.

Nobeta Edaletî ya ke vera tecrîdî hetê parlamenteranê HDPyî ra ameyêne girewtêne roja xo ya 32yine de ameye qedînayîş. Hetê parlamenteranê HDPyî ra, baxçeyê meclîsî de malûmatêk ame dayene.

Nobete qedîyaye

Nobete de Serekwekîlê Grûba HDPyî Sarûhan Orûçî dîyar kerd ke, roja peyêne ya Nobeta Edaletî ya û va, “Dinya de nimûnenêko winasî çin o. Tecrîd tena qedexeyê pêvînayîşan ra nîno pê, eynî wextî de hiqûq orte ra wedarîyayo. Tecrîd leteyê polîtîkayê vera desvkewteyanê Kurdan o. Bi eşkera hiqûqo mîyannetewî û yê zereyî yeno binpaykerdiş. Pêro muqaveleyê mîyanneteweyî ameyê binpaykerdiş. Na mesela hinî bîya meseleya hiqûqnasanê dinya.”

‘Bîya meseleya mîyanneteweyî’

Orûçî va, “29 baroyan ra 775 awiqatan 10-17ê Hezîrane de sseba pêvînayîşan muracat kerd. Muracatê înan bêcewab mend. Dima Yewîtîya Awiqatanê Ewrûpayî ra 22 welatan ra 350awiqatan 14ê Tebaxe de muracat kerd, û hetê înan ra mektube ame erşawitiş la cewab nêdîya înan. Dima Fas, Filistîn, Mintiqaya Kurdistan, Iraq, Lubnan, Misir, Bak3ur û Rojhelatê Sûrîye û Urdunî ra 756 awiqatan seba pêvînayîşan muracat kerd la cewab nêdîyayo înan zî.”

‘Ocalan cîyayîyêk nêwazeno’

Orûçî  peynî de va, “Birêz Ocalan cîyayîyêk nêwazeno. Ocalanî vato ‘ez cîyayîyêk ney hiqûq wazena’. Ma zî muracatanê xo de cîyayîyêk ney hiqûq wazenê. Ma wazenê wa hiqûq bêro  ramitene. Ma 32 rojan ra dima Nobeta Edaletî qedînenê. 6ê Sibate de ma do Qoser û Gever ra rayîrşîyayîş bidê dest pêkerdiş. Çunke na bêhiqûqîye ganî cade wedarîya û pêvînayîşî bêrê kerdene. Ma reyna wezaretîye rê gazîye kenê. Wa hiqûq bêro ramitene û wa cewab bidîyo muracatan.”

MA / ENQERA