MÎT’ê girtî veguhestin Raî û Hewar Kils

Rêxistina Mafên Mirovan a Efrîn-Sûriyeyê da zanîn ku îstîxbarata dewleta Tirk beriya nêzî mehekê navbera 600-700 dîlgirtî, sewqî girtîgehên Raî û Hewar Kilsê yên di bin dagirkeriya dewleta Tirk û çeteyên wê de kirin.

Rêxistinê bi bîr xist ku dewleta Tirk û çeteyên wê piştî dagirkirina Efrînê (18 Adar 2028) bi hezaran sivîl revandin, hin sewqî girtîgehên li Tirkiyeyê kirin û yên di girîgehên çeteyan de ragirtin. Li gorî agahiyên ku rêxistinê parve kirine, revandiyên ku sewqî girtîgehên Raî û Hewar Kilsê hatine kirin di dema lêpirsînê ya di girtîgeha Raî êşkence û muameleya herî xirab li wan hate kirin. Di heman demê de rê nedan ku bi malbatên xwe re peywendî deynin. Rêxistinê îşaret bi wê yekê kir ku girîgeha Raî ku di bin kontrola çeteyên "Ceyş El Wetenî" de ye û rasterast ji aliyê dewleta Tirk ve tê birêvebirin, yek ji girîgehên herî xirab li herêmê ye. Li gorî rêxistsinê, çete û dagirkeran bi hinceta lêgerîna çekan bi ser gundên Efrînê de girtibûn, bi dehan ciwan bêyî hebûna delîlên qanûnî an jî bi awayekî bi guman, an jî dîtina kesayetên Kurdî di malên wan de revandin. Rêxistina Mafên Mirovan a Efrîn-Sûriyeyê diyar kir ku armanca veguhestina revandiyan bo her du girtîgehan ew e ku "bên veşartin û ji malbatên wan bên dûrxistin, da ku li gorî mercên siyasî û ewlehiyê û asta pabendîbûna bi peymana 10’ê Adara 2025’an a di navbera QSD û hikumeta Şamê de, di peymanên gengaz ên pevguhertinê yên ligel QSD’ê de werin bikaranîn." Rêxistinê di dawiyê de banga serbestberdana revandiyan kir.

ANHA