Meclîsa Minbicê: Em ê gel û xaka xwe biparêzin

• Fermandarê Giştî ya Meclisa Leşkerî ya Minbicê Îbrahîm Hemdan destnîşan kir ku rola wan ne tenê parastin e, ew ê bersivan jî bidin êrîşên dagirker ên Tirk û got wê herêmê ji êrişan biparêzin û di vê yekê de bi biryar in.

Artêşa Tirk a dagirker û çeteyên wê ji 23`yê Cotmehê ve êrişên xwe yên li dijî Rêveberiya Xweser a Bakur-Rojhilatê Sûriyê zêde kirin. Li hember wan êrişan, Hêzên Sûriya Demokratîk (QSD) di çarçoveya mafên parastina rewa de, çalakiyên leşkerî kirin. 

Bi wê çarçoveyê  Hêzên Meclisa Leşkerî ya Minbicê û Hêzên Cebhet El Ekrad 24`ê Cotmehê baregehên dewleta Tirk topbaran kirin.

Êrîş zêde kirin

Fermandarê giştî yê Hêzên Meclisa Leşkerî ya Minbicê Îbrahîm Hemdan ku ji ANHA’yê re axivî got, "Dewleta Tirk a dagirker û çeteyên wê ji baregehên xwe yên li herêmên dagirkirî, êrişên li eniyên kantona Minbicê zêde kirin."

Êrîş bêbersiv namînin

Hemdan soz da ku êrişên dewleta Tirk a dagirker ên li dijî herêmê û sivîlan, bêbersiv nehêlin û got: "Hêzên me, tevgera leşkerî ya dagirkeran li eniyên Minbicê dişopîne. Dagirkeran dikên moşekan, topavêjan û tank amade kirine."

Hemdan diyar kir ku li hember van tevgeran jî wan tedbîrên xwe girtine û li hember her êrişekê amade ne.

Rola me ne tenê parastin e

Îbrahîm Hemdan têkildarî êrişên dewleta Tirk 26`ê Cotmehê daxuyaniyek da bû û wiha gotibû: "Rola me ne tenê parastin e. Madem gelê me rasterast tê hedefgirtin, Hêzên Meclisa Leşkerî ya Minbicê jî amade ne bi awayekî guncaw bersivê bidin."

Hemdan destnîşan kir ku erka wan a sereke û bingehîn parastina gel e û wiha domand: "Em ê ewlehiya herêmê û şêniyên kantonê û herêmên Bakur û Rojhilatê Sûriyeyê biparêzin. Em di vê yekê de bi biryar in."

Di êrişên dewleta Tirk a dagirker ên 24`ê Comtehê li dijî kantona Minbicê de, zaroka bi navê Fereh El Berho ya 11 salî şehîd bûbû û birayê wê Semîr El Berho yê 8 salî birîndar bûbû. Dewleta Tirk rasterast mala wan topbaran kiribû.

ANHA