Malbata Ocalan: Wî hêz da me

Endamên malbatê yên ku bi Rêberê Gelê Kurd Abdullah Ocalan re hevdîtin pêk anîn, diyar kirin ku "Berxwedana wî moralê me bilind kiriye." Her wiha daxwaza xwe ya ji bo hevdîtina zêdetir bi Abdullah Ocalan re anîn ziman û gotin, "Em azadiya fîzîkî ya Rêber û hemû girtiyan dixwazin."

Rêberê Gelê Kurd Abdullah Ocalan di 31'ê Cotmehê de bi malbata xwe re hevdîtin pêk anî. Bi daxuyaniyekê ku ji hêla Buroya Hiqûqê ya Asrinê ve bi rêya hesabê xwe yê X'ê weşand, hate gotin ku endamên malbatê Fatma Ocalan, Berfîn Ocalan, Alî Ocalan û Omer Ocalan ji bo hevdîtina bi Rêberê Gelê Kurd re çûne Girava Îmraliyê.

Endamên malbatê Fatma Ocalan û Berfîn Ocalan li ser hevdîtinê axivîn.

Fatma Ocalan piştî 11 salan serdana birayê xwe Abdullah Ocalan kir û hestên xwe parve kir. Fatma Ocalan got, "Min digot qey ez êdî nikarim Rêber bibînim, lê ez çûm û min ew dît. Şikir ji Xwedê re, ew baş bû û silavên xwe ji her kesî re şand. Wî ez hembêz kirim û destê xwe danî ser milê min. Moralê wî bilind bû. Ew ne pîr bû, ew ji me baştir bû û me ew baş dît. Wî bi me re wêneyek kişand. Elî, Omer û Berfîn jî çûn. Em çar kes bi hev re çûn hundir. Serok got, 'Bila Fatma bi min re were,' ez jî çûm. Dema ku em axivîn, ez kelecanî bûm. Di serdana berê de, ji ber pirsgirêkên tenduristiya min nehiştin ez têkevim hundir, digotin ku ez dikarim zehmetiyan çêbikim. Ger ku disa gazî bike dikarim biçim 3 caran min hembez kir."

Berfîn Ocalan, yek ji endamên malbatê ku beşdarî hevdîtinê bû, wiha got: "Me hevdîtin kir û atmosferek cûda bû. Min ji ber ku cara yekem ew dît pir kêfxweş bûm. Moralê wî pir baş bû û ji hêla fîzîkî ve jî pir baş bû. Me saetek û nîvek hevdîtin kir; ew saetekê bi Kurdî, paşê nîv saetê bi Tirkî bi me re axivî. Di vê demê de, ew bi piranî bi dapîra min Fatma re axivî û li ser bîranînên zarokatiyê axivî. Ew her tim dikeniya, moral û hêzek zêdetir dida me. Wî ji min re got ku ez ê nirxên malbatê biparêzim û dilsoz bimînim. Wî pênûsek wek diyariyekê da min, ez pir kêfxweş kirim. Bi rastî jî atmosferek pir cûda bû."

Berfîn Ocalan, diyar kir ku ew dixwazin gelek caran bi Rêberê Gelê Kurd re hevdîtinê bikin û got: "Em azadiya fîzîkî ya Rêber û hemû girtiyan dixwazin. Sekna wî  ya berxwedêr  û moralê wî yê bilind moralê me bilind kir. Wî silav ji her kesê ku li  wî dipirsî re şand û ji gel re jî." Berfîn Ocalan diyar kir ku meşa ku ji aliyê Tevgera Jinên Azad (TJA) ve di navbera 1 û 7'ê Cotmehê de ji Amedê heta Enqereyê bi dirûşmeya "Em bi hêviyê ber bi azadiyê ve dimeşin" hatiye organîzekirin, Abdullah Ocalan pir kêfxweş kiriye û got, "Ew pir kêfxweş bû ku meşvanên azadiyê di navbera 1 û 7'ê Cotmehê de hatin Amarayê. Dema ku wî ev yek vegot, ew her tim dikeniya."

JINNEWS/RIHA/GULISTAN GULMUŞ