Lolan; abûmeke ku coş diherike

Duşem 31 Adar 2025 - 02:15

Albûma nû ya Bermal Çem a bi navê “Lolan“ derket. Bermal Çem bi berhemên di vê albûmê de şehîdan, dayikên windayan, şoreşgerên têkoşer û afirînerên şoreşa jinê aniye ziman.

FIRAZ BARAN / KOLN

Albûma nû ya stranbêj Bermal Çem derket. Navê albûmê "Lolan" e. "Lolan"ê Kurd Recordsê derxist. Stranbêj roja Şemiyê li Frankfurtê beşdarî pîrozbahiya Newrozê bû û albûma xwe li vir li standa Kurd Recordsê îmze kir.

Albûma "Lolan"ê ji 12 stranan pêk tê û du aranjeran amade kiriye: Memo Gül û Mazlum Rewşen. Bermal Çem bi berhemên di vê albûmê de şehîdan, dayikên windayan, şoreşgerên têkoşer û afirînerên şoreşa jinê aniye ziman. Albûm bi muzîka xwe ya dewlemend lê sade balê dikişîne. Bermal Çem albûma xwe diyarî şehîd Şoreş Arjîn (2019) kiriye. Şoreş Arjîn gerîlayek muzîkjen û wênesaz bûye.

Tabloya berga albûmê wênesaz Sînan Hezer xêz kiriye. Di tabloyê de cîhan xuya dike. Li ser cîhanê darek heye. Koka darê li cîhanê belav bûye û gerîlayek jin di bin siya wê de rûniştiye. Wênesaz dareke Lolanê fikiriye û xêz kiriye. Dema mirov li tabloyê dinêre slogana "Jin Jiyan Azadî" ya ku bandor li cîhanê kirî û şoreşa Tevgera Jin a ku li cîhanê belav bûyî tê bîra mirov.

Di albumê de stranek Şehîd Berçem jî cih digire. Navê stranê “Tîrêjên Rojê” ye. Şehîd Berçem şoreşgerek bû. Îro bo bîranîna wê li Helebê li ser navê Şehîd Berçem festîvalek tê lidarxistin.

Lolan çemek e û bicoş diherike

Jînda Asmen li ser albûma “Lolan”ê nirxandineke bi vî rengî kiriye; “Jineke şoreşger a li çiyayan hunera xwe bost bi bost hûnayî û şop hiştî. Li kî derê dibe bila bibe hunermenda me ku bi vê mîrateyê hunera xwe afirand, Bermal Çema me ya di dilê gerîla, gel û me hemûyan de cih girtî. Bi albûma Lolanê hunera te bi ava jiyanê, stranên te hemû bi çemekê dest pê dikin û dibin sitargeh. Lolan li çiyayên Kurdistanê çemek e. Bi coş diherike ji Zagrosan. Kî dizane, Lolan bû şahidê çend jiyanan, pêl da û fûriya. Parçeyek ji me jî herikî bi te re, li gel wan jiyanên têr û tijî. Em bûn ava çeman, me fitlonek çêkirin li singa axê. Her mirovê ku wateyê bar dike û wisa ji avan derbas dibe, xwe dibîne di avê de. Her wekî ava jiyanê. Her kes bi rengekê di rêyên hunerê re dimeş e, tu jî Bermala min bi mûzîka xwe herikî. Wekî Lolanê te jî xemgînî, dilxweşî, êş, keyfxweşî û çîrokên rêwiyên destana hebûna welatekî bi hunera xwe herikand. Erê hevala min Bermal Çem. Di stranên te tevî de mirov dikare jiyanê hemûyê weke yek jiyanê hîs bike, bêguman ev ji bo min wisa ye. Tu dikarî di stranên xwe de jiyanan bigehînî hev.”

Bi enstrûmanên resen hatiye hazirkirin

Teknolojî li muzîka îroyîn serdest e. Gelek hunermend bi komputeran muzîka stranên xwe çêdikin. Lê albûma Bermal Çem bi enstrumanên resen hatiye amade kirin. Teknolojiya komputerê pir kêm hatiye bikar anîn. Her wiha, piraniya stranbêjên îroyîn tenê singlekê (yek an du stran) derdixin. Di hawîrdoreke wiha de Bermal Çem bi gelek mûzîkjenan re kar kiriye. Hunera xwe bi enstrumanên dewlemend derxistiye û albûmek amade kiriye û pêşkêşî guhdaran kiriye. Rexnegir vê yekê girîng dibînin.

Strana "Qasimo"

Strana "Qasimo" ji bo Endamê Komîteya Navendî ya PKK'ê şehîd Kasim Engîn hatiye amade kirin. Gotin û muzîka stranê yê Bermal Çem e. Hunermend di vê stranê de bi Serhad Çarnewa re duetê dike. Gotinên stranê wiha ye:

Ez ne teyrek xerîb im

Stranek hevalbend im

Dipirsim ji hesreta dila:

Her tu yî, ey, lawê çiya

Gav bi gav li ser şopa te

Digerim li jiyana te

Dibînim di rihê xwe de, lo

Ji Engîze ta Botan

Ji Zagrosan ta Qendîl (Behdînan)

Bête nabe, hevalo

Dilê Şekîf dikele

Ji Lolanê re dixwîne