Kuştin bi zimanê pergalê tê rewakirin

ROZA METÎNA / AMED

Aktivîsta TJA’yê Zozan Înal da zanîn kuştin, tundiya li ser jinan her diçe zêde dibin û got:” Kuştin, tundiya li ser jinan bi zimanê pergalê tê rewakirin. Jin bi taybet dema li ziman, çand, huner û îradeya xwe xwedî derdikevin tên qetilkirin. Jinên jiyanê diafirînin dibin hedef.”

Kuştin û tundiya li ser jinan li Kurdistan û Tirkiyeyê bi destê îktidara heyî her diçe zêde dibe. Cenazeyê Atabey ku li taxa Belediyevleri ya navçeya Ceyhan a Edeneyê ji aliyê Eyup Atabey ve hate qetilkirin, piştî otopsiya li Saziya Tipa Edlî ya Edeneyê birin navçeya Cizîrê ya Şirnexê. Endamên Tevgera Jinên Azad (TJA) û Dayikên Aştiyê li Goristana Asrî darbesta Sebahat Atabey hildan ser milan û birin gora lê bê veşartin. Dîsa Sebahat Atabey li Ceyhanê ji aliyê Eyup Atabey ve hate qetilkirin. Li gorî çeteleya tundiyê ya meha Gulanê ya JINNEWS'ê 21 jin hatine kuştin, 19 jin û 3 zarok di bin şert û mercên gumanbar de mirî hatine dîtin.

Aktivîsta Tevgera Jinên Azad (TJA) Zozan Înal têkildarî armanc û sedema kuştin û tundiya li ser jinan nirxandin kir. Di heman demê de bal bir ser şerê di navbera Îran û Îsraîlê de her wiha bandorên wê yên li ser jin û civakê.

Pergal dixwaze îradeya jinê têk bibe 

Zozan Înal di destpêkê de da zanîn jin ji ber lêgerîn û heqîqet e loma jî dibe hedef û wiha got:”Jin, jiyan, lêgerîn û heqîqet e. Li xwe û xwezaya xwe xwedîderketin e. Li xwedîderketina nirxê xwe ye. Jin di heman demê de civak û civakbûyin e. Loma jî pergal bi taybetî bedena jinan hedef digire. Pergal bi vî hawî dixwaze civakê bifetisîne. Pergal dixwaze di kesayeta jinê de civakê bifetisîne û îradeya jinan têk bibe û  ji holê rake.”

Şerê taybet tundî ye 

Zozan Înal bi lêv kir ku hedefgirtina jinan û civakê bi polîtîkayên şerê taybet jî girêdayîne û wiha pê de çû:”Desthilatdar dixwazin bi rêbaza polîtîkayên şerê taybet vîna jinan teslîm bigirin. Dixwazin di kesayeta jinê de civakê teslîm bigirin. Loma jî desthilatdar êrişên curbecur li hember jinan pêk tînin. Jixwe yek ji van êrişên curbecur jî şerê taybet e. Bi taybet jî jinên kurd dibin hedef. Dixwazin wiha jinên kurd ji nirxên wan jî dûr bixin. Dixwazin bi tundiyê jin ji nasnameya xwe dûr bikevin. Wexta wiha be civak jî ber bi rizandinê ve diçe. Ji ber ku jiyan bi jinan dest pê dike. Xweza û hebûnê bi jinan dest pê kiriye.”

Kuştin bi zimanê pergalê tê rewakirin 

Zozan Înal da zanîn yek ji cureyê tundiya li ser jinan qeyrana aboriyê ye û wiha lê zêde kir:”Yek ji cureyên êrişa li ser jinan qeyrana aboriyê ye. Dixwazin wiha jinan mehkûmî malê bikin. Dema jin bixebitin baweriya wan pêş dikeve û di warê aboriyê de li ser lingên xwe disekinin. Pergal naxwaze bi vî rengî azadiya jinan pêk were. Her diçe qetilkirin bi vî rengî zêde dibe û ev qetilkirin jî ne ji rêzê ne. Kuştin, tundiya li ser jinan wiha bi zimanê pergalê tê rewakirin. Jin bi taybet dema li ziman, çand, huner û îradeya xwe xwedî derdikevin tên qetilkirin. Jinên jiyanê diafirînin dibin hedef û tên qetilkirin.”

Rewakirina polîtîkayên bêcezahiştinê 

Zozan Înal bal bir ser polîtîkayên bêcezahiştinê û zimanê zayendperest û wiha dewam kir:”Yek ji polîtîkayên pergal dixwaze rewa bike polîtîkayên bêcezahiştinê ye û ev yek jî dibe sedema tundiya li ser jinan. Ya ku hêzê dide kujeran polîtîkayên bêcezahiştinê ye. Bi taybet ev yek ji bo mêrên dixwazin li her derê li ser jinan tehekuma xwe ava bikin, fersendek e. Divê ev hişmediya mêr-dewletê bi dawî bibe. Yan na wê her tim jin bên qetilkirin. Divê li dij polîtîkayên bêcezahiştinê û hişmendiya mêr têkoşîneke hevpar hebe. Kujerên jinan li her derê ne û ewlehiya jinan tune ye. Di heman demê de zimanê zayendperest ê dewletê jî dibe sedema kuştina jinan û tundiya li ser jinan. Ji ber ev pergal tu carî naxwaze jin hilmê bistîne. Loma jî pergala serdest her tiştî li gor fetisandina jinan dîzayn dikin.”  

Şer zirarê dide jinan

Zozan Înal di heman demê de bal bir ser şerê ku dewam dike û wiha got:”Şerekî mezin îro dewam dike. Şer li ku derê dibe bila bibe zirareke mezin dide jin û civakê. Bedela herî giran a şeran jî jin û zarok didin. Di şer de jin û zarok hem tên kuştin, hem di aliyê aboriyê de tên fetisandin, hem jî jiyana wan tê wêrankirin. Dîsa bi şer rêya koçberiyê vedibe. Di şeran de jin wekî ganîmet tên dîtin. Her tim hatiye xwestin jin bibin kole. Pergalê tu carî nexwestiye jin bibin xwedî gotin. Li dijî vana jî wekî Tevgera Jinên Azad (TJA) elbet kar û xebatên me jî hene. Em bi jinan re tên gel hev, em li ser mijarên tundî, aborî, xweparastin, şerê taybet atolyeyan li dar dixin. Jin jî ji ber van atolyeyan kêfxweş dibin.”

Şerê Îran-Îsraîlê bandorê li jinan dike 

Zozan Înal di heman demê de bal bir ser şerê di navbera Îran û Îsraîlê de bandorên vêya yên li ser jin û civakê û wiha dewam kir:” Îsraîl îro hegemonyayek pir mezin e. Hêzeke mezin e û vêya jî ji hegemonyaya xwe digire. Rejîma Îranê jî îro hukmê xwe li ser jin û civakê dike. Îran jî rejîmeke qirêj e. Rejîma Îranê çarşefa reş mîna DAÎŞ’ê li ser jinan ferz dike. Bi îdamê gefê li kurdan û gelê dinê dixwe. Loma şerê di navbera Îran û Îsraîlê bandoreke neyînî bi taybet li ser zarok û jinan her wiha civakê dike. Her çiqas agirbestek mijara gotinê be jî lê şer hîn dewam dike. Li Bakurê Kurdistanê jî bi girtin, binçavkirin û polîtîkayên çewisandinê tê xwestin kurd bibin hedef. Nayê xwestin kesek fikir û ramanên xwe bînin ziman. Îran jî Tirkiye jî wekî hev in. Loma dem û cih ferq nake, divê em li hember vî şerî xwe biparêzin. Çawa bi felsefeya Jin Jiyan Azadî jin daketin qadan û xwe parastin em ê dîsa bi hev re xwe biparêzin.”