Komîna Sînemayê kargehên lîstikvaniyê vekir

Komîna Fîlm a Rojava bi piştgiriya TEV-ÇAND’ê, bi armanca pêşxistina lîstikvaniya sînemayî kargehek vekir. Kargeh di 16’ê Tebaxa 2025’an de dest pê kir û dê 30 rojan bidome. 15 jin û mêr ji bo fêrbûna lîstokvaniya sînemayê tev li kargehê bûne. Di hefteyê de 6 rojan, her roj 8-9 demjimêran perwerde tê dayîn. Kargeh li navenda TEV-ÇAND’ê ya li bajarê Qamişlo ya Kantona Cizîrê ya Bakur û Rojhilatê Sûriyê hat vekirin. Derhêner û lîstokvan Zuhêr El Umer kargehê bi rê ve dibe û kesên beşdar bûne perwerde dike.

Di warê lîstikvaniyê de kêmasî hene

Endamê Komîna Fîlm a Rojava Raman Berzencî li ser xebatên kargehê ji me re axivî û got, “Di aliyê lîstikvaniya sînemayê de kêmaniyên me hene. Em di aliyê castingê ve zehmetiyan dijîn. Li gel me lîstikvanên akademîk tune ne.” Raman diyar kir ku dema ew fîlmekî çêdikin, an kesên ku qet lîstikvanî nekirine, yan jî lîstokvanên şanoyê digirin û wiha domand: “Ji bo em wan kêmaniyan derbas bikin me pêwîstî bi kergehek wiha dît. Em ê di projeyên xwe yên pêşerojê de cih bidin van hevalên niha perwerdeyê dibînin”.

Em ji xwendekarên sînemayê bi hêvî ne

Raman destnîşan kir ku niha tenê li bajarê Qamişloyê ev xebat tê meşandin, lê plan dikin ku li bajarên din ên Bakur û Rojhilatê Sûriyê jî bimeşînin. Ji bo pêşxistina lîstikvaniya sînema niha li ser hinek plansaziyan kar dikin, dema plansaziya xwe diyar kirin dê bi ragihandinê re par ve bikin. Raman anî ziman ku niha li Peymangeha Bilind a Hunerê ya Dêrikê û Peymangeha Bilind a Hunerê ya Hesekê beşê sînema hene û xwendekar tê de kar dikin. Lê ji ber ku herdû peymangeh pir nû ne, nikarin xwendekarên wan bixin nava xebatan. Raman got, “Em ji bo pêşerojê ji wan bi hêvî ne.”

Hêjayî bi bîrxistinê ye Peymangeha Bilind a Hunerê ya Hesekê di 29’ê Mijdara 2024’an de ji aliyê Hîlala Zêrîn ve hat vekirin. Peymangeh ji 5 beşan pêk tê: wênesazî, peykertiraşî, mûzîk, şano û sînema. Peymangeha Bilind a Hunerê ya Dêrikê di 17’ê Cotmeha 2024’an de, ji aliyê Desteya Çandê û bi alîkariya zanîngeha Rojava û Tevgera Çand û Hunerê hat vekirin. Peymangeh ji beşên mûzîk, şano û sînema pêk tê.

Ev peymangeh dê 3 salan berdewam bikin. Piştî bidawîkirina xwendinê, xwendekar dê bawernameyên fermî ji aliyê Rêveberiya Xweser wergirin.

ANHA/QAMIŞLO