Jinên Kurd pêşengên têkoşîna femînîst in

Civaknas û Ekofemînîst Prof. Laura Corradi têkildarî mijarên azadiya jinan, tundiya li ser jinan, paradîgmaya azadiya jinan a ji aliyê Rêber Apo ve hatiye pêşxistin ji ANF’ê re axivî.

Prof. Laura Corradi piştre bal kişand ser bandorên şer, milîtarîzm û komkujiya ekolojîk ên li ser jinan û got:’’Di rastiyê de, di nava şerekî de tundiya li ser jina tim zêde dibe. Hemû cureyên tundiyê zêde dibin, lê belê bi taybetî tundiya li ser jinan zêde dibe. Di rewşeke krîzê de, di dema bobelatên ekolojîk, krîzên civakî de bedêlên herî giran jin didin.’’

Laura Corradi di dewama axaftina xwe de bal kişand ser analîzên Rêber Apo yên têkildarî azadiya jinan û got:’’A rastî, xebat û nivîsên Abdullah Ocalan yên beriya girtîgehê û xebatên li girtîgehê ku ev zêdetirî 25 salan e tevkariyeke mezin li analîzkirina kolekirina jinan dike. Diyar kiriye ku ev yek ji ku hatiye û di xalên diyar ên dîrokê de jin çima hatine kolekirin. Û teoriya sosyolojiya azadiyê ya Ocalan, azadiya jinan weke xala yekemîn di nava xwe de dihewîne.  Di gel ku gelek şoreşger azadiya jinan di dawiya pêvajoya şoreşê de bi cih dike jî Abdullah Ocalan azadiya jinan di destpêka pêvajoya şoreşê de bi cih dike. Abdullah Ocalan li dîrokê dinêre û bi awayekî eşkere diyar dike ku dema hemû pirsgirêkên din tên çareserkirin divê meseleya ku di destpêkê de were çareserkirin, meseleya jinan be. Li gorî Abdullah Ocalan azadiya civakê li gel azadiya jinan pêkan e. Ev yek jî pir girîng e û balê dikişîne. Ji ber wê yekê di çarçoveya teoriya femînîst de tevkariyeke zêde kiriye û divê em ji bo vê yekê spasiyên xwe li Abdullah Ocalan bikin.’’

Ocalan pir girîngiyê dide heqîqetê

Civaknas û Ekofemînîst Prof. Laura Corradi diyar kir ku jinên Kurd ji tevgera femînîst a li çapa cîhanê re pêşengiyê dikin û xweparastinê weke ruheke jinê ya kolektîf dibînin.

Prof. Laura Corradi destnîşan kir ku xweparastin têkildarî xwerêxistinkirinê jî ye û got:“Divê di navbera jinan de bawerî jinûve were avakirin. Bawerî, ji xwe bawerbûn, xwerêxistinkirin û xweparastin… Ev encex bi jiyaneke azad re dikare bi ser bikeve. Ev encex bi pratîkê dikare bi ser bikeve; ne bi teorî, gotin û nivîsê. Gundê Jinwar a li Rojava tê bîra min; ew cihê ku jin xwedî derfetê bi tena serê xwe jiyankirinê ne… Li gorî min ev pêşketin hemû çavkaniya xwe ji hêza mezin a Abdullah Ocalan daye jinan digire. Ez li zanîngehê têkildarî zanist û zayenda civakî ders didim û nîvê refa min xwestin tezên xwe yên qedandinê li ser jineolojiyê çêbikin; ji ber ku radîkaltiya têgeha jineolojiyê fêm kirin. Jineolojî tevkariyê li tevgera femînîst a kûreyî dike; ji ber ku jineolojî pratîkek ji mêtingeriyê qut e. Pratîkeke ekolojîk a jinûvehilberandinê ye. Lewma tevkariyeke pir mezin e û li gorî min beşekî mezin ê tevgera femînîst a kûreyî ji tevgera Kurd û jineolojiyê îlhamek mezin wergirtiye. Ez têkildarî azadiyê ders didim, têkildarî heqîqetê perwerde didim; ji ber ku bi rastî jî heqîqet pir girîng e. Abdullah Ocalan jî pir girîngî daye heqîqetê. Eger em xwe negihînin heqîqetê û heqîqetê nebêjin, em bi ser nakevin. Lewma hêvî bi têkoşînê re girêdayî ye.”

ANF/SERKAN DEMÎREL