- Hunermend Es Devlîn dibêje, peywendiya xebata wê bi malê re heye, yanî bi wî mekanê mirov şên dikin. Ew vê weke çandeke dibîne û hewl dide guhdariya bajêr bike û wî hîs bike. Ji bo xebat xwe dibêje, erê, hin tiştan hînî insanan dike, û wekî din wan vedixwîne ku bîra hin tiştan jî bibin.
XASÊ CÛNÊ
Hunermend Es Devlîn, bi muzîk û ronahiyê, peykerên gelemperî ango giştî çêdike û bi saya muzîk û ronahiyê zimanekî hunerî ji xwe re afirandiye. Her wiha ji teknolojiyê jî sûdê werdigire û ji bo karên xwe bi kar tîne. Bi van peykerên xwe yên ku li meydanên giştî nîşan dide, dixwaze perspektîfa mirovahiyê ya hezarê salan a ku hatiye guhertin nîşanî xelkê bide. Yanî ew bi van peykerên xwe li rabuhiriyê difikire û derbarê siberojê de jî dike ku meriv bifikirin. Çaxê meriv li peykerên wê dinihêre ne mumkin e ku meriv nebe perçeyekî karê wê, ew naxwaze meriv li derveyî peykerên wê bimînin û wan jî bi awayekî tevlî karê xwe dike. Ji lewma, heya jê tê peykerên xwe bi awayekî gelemperî nîşanî civakê dide û li derveyî salonan difikire. Her wiha bi van karên xwe merivan dide fikirandin jî.
Es Devlîn bi xebata xwe ya dawî ya bi navê “Come Home Again” (Dîsa vegere malê) li ser xwezayê û cihê insanan yê di nav vê xwezayê de hiziriya, hûr kolaya û dixwaze xelk jî li ser vê yekê bifikire. Wê bi riya vî peykerî, bi destan wêneyê 243 cûre heywanab xêz kiriye. Heywanên ku xêz kirine axlebê wan yên ku li ber nemanê ne, yanî mesela wan a man û nemanê heye. Wê ji ronahiya Dêra St. Paul a Londonê îlham girtiye û heman ronahiyê ji bo peykerê xwe jî bi cih kiriye. Jixwe, peykêrê ku çêkiriye jî li Tate Modern Garden tê nîşandan û li hember dêrê disekine. Wê înstalasyona xwe bi aweyekî wisa sêwirandiye ku meriv dikarin bikevin hundirê wê jî. Di nav wêneyên ku xêz kirine de gelek kêzik, çûk, masî, mar û cûreyên din yên heywanan hene.
Stranek ji bo hewyanên tinebûyî
Xebata Es Devlîn dişibe qubeyekê. Jixwe, ew jî dibêje, “Li gorî min qub dihate maneya xanî jî.” Û derbarê karê we de wiha derdibire, “Ev xebat girêdanekê bi mala me re ango xaniyê em lê dijîn çêdike. Divê em weke çandekê bibînin vî tiştî û karibin li bajarê xwe guhdarî bikin û her wiha hîs bikin. Ev xebata min jî li gel ku hin tiştan fêrî insanan dike, wekî din wan vedixwîne ku bîra hin tiştan jî bibin. Ev xebata min stranek e, ji bo wan heywanan e ku li ber nemanê ne, meseleya wan a man û nemanê heye û hindik maye tine bibin.”
Ji bo heywanan li warekî digere
Her şev komek muzîkjen ango koroyek diçe di hundirê peykerê Es Devlîn de stranan dibêje. Bi vî awayî meriv li dengê çûkan, şevşevok û kêzikan guhdarî dikin. Ji lewma ev deng hemû bi wêneyên Es Devlîn ku wê yek bi yek, bi qelemê xêz kirine, dibin yek û li bajêr dengekî bêhempa olan dide. Es Devlîn ji bo van heywanên li ber nemanê, li warekî digere da ku tê de bisitirin. Kesên ku diçin serdana peykerê wê jî vê daxwaz û armanca wê baş dibînin û hîs dikin. Ew bi van xêzên xwe dixwaze heywanan bi xelkê bide naskirin jî û bîne bîra wan ku ev heywan li ber nemanê ne.
