Ji ber name ji Ocalan re şand hat cezakirin

Parêzer Mehmet Sonmez diyar kir ku ji ber nameya ku ji Abdullah Ocalan re şandiye, rêveberiya girtîgehê li dijî muwekîla wî Habîbe Elhalîl El Muslumê lêpirsîn daye destpêkirin û got li girtîgehê tu ewlehiya girtiyan a jiyanî tune ye.

Habîbe Elhalîl El Muslumê, jineke ji Bakur û Rojhilatê Sûriyeyê ye ku di 8'ê Kanûna 2022'yan de li Amedê bi îdiaya "endamtiya rêxistinê" hat girtin û darizandina wê berdewam dike. Habîbe Elhalîl Elmuslum binpêkirinên ku li Girtîgeha Tîpa E ya Amedê pê re rû bi rû maye bi rêya parêzerê xwe ragihand. Parêzerê wê Mehmet Sonmez diyar kir ku wan li dijî kesên ku binpêkirinên mafên mirovan li dijî muwekîla wê kirine giliyê sûc kiriye. Sonmez diyar kir ku nameya ku muwekîla wî hewl da di 18'ê Tîrmehê de ji Rêberê Gelê Kurd Abdullah Ocalan re bişîne hatiye desteserkirin û bûye sedema lêpirsîna disiplînê. Her wiha Sonmez diyar kir ku dema ku Habîbe Elhalîl El Muslumê birine nexweşxaneyê îşkence lê hatiye kirin.

Mehmet Sonmez, diyar kir ku sedema desteserkirina nameya muwekîla wê gotina "Dema ku ez ji vir derkevim, ez ê vegerim welatê xwe Rojavayê, li wir jiyaneke komunal ava bikim û hewl bidim ku bi hişmendiya ekolojîk bijîm" e. Sonmez anî ziman ku rêveberiya girtîgehê ev daxuyanî wekî "talîmat" û girêdana "rêxistinî" şîrove kiriye û got: "Bikaranîna peyva 'Rojava' di nameyê de hat astengkirin û sansûrkirin, wekî talîmat û girêdana rêxistinî hat binavkirin.

Mehmet Sonmez, destnîşan kir ku muwekîlê wê ku di 14'ê Tebaxê de ji ber pirsgirêkên tenduristiyê sewqî Nexweşxaneya Perwerde û Lêkolînê ya Gazî Yaşargîl hatiye kirin, di rê de îşkence lê hatiye kirin.

Mehmet Sonmez, anî ziman ku ku tevî êrişê jî, destûr nehatiye dayîn ku muwekîlê wî li nexweşxaneyê raporê wergire.

Mehmet Sonmez, bi lêv kir ku wan der barê bûyerê de li Serdozgeriya Komarê ya Amedê gilî kiriye û got: "Me daxwaz kir ku delîlên pêwîst, bi taybetî dîmenên kameraya nexweşxaneyê û rapora êrişê, werin berhevkirin û lêpirsîn der barê cendermeyan û hemû kesên ku tiliya wan di bûyerê de heye were kirin. Em ê bi israr lêpirsînê bişopînin."

Habîbe Elhalîl El Muslumê di gilînameya xwe ya ji bo Serdozgerê Komarê yê Amedê de behsa bûyerê kir û got ku li girtîgehê tu ewlehiya wan a jiyanî tune ye.

MA / AMED / HEVAL ONKOL