Înîsiyatîfa Erebî: Deriyê Îmraliyê vekin

Înîsiyatîfa Erebî ya ji bo Azadiya Abdullah Ocalan, bi hevkariya komek rewşenbîr û ramanwerên Ereb, daxuyaniyek mirovî û siyasî weşand û daxwaza serbestberdana tavilê ya Rêber û ramanwer Abdullah Ocalan kir, ku zêdetirî bîst û şeş salan e li girava Îmraliyê ya Tirkiyeyê girtî ye. Daxuyaniyê tecrîda wî ya berdewam wekî tepeserkirina bi zanebûn a dengek ku dikare beşdarî rizgarkirina Rojhilata Navîn ji çerxa pevçûn û dabeşbûnê bibe, nirxand. Di daxuyaniyê de hate destnîşankirin ku Ocalan, tevî salên tecrîdê, hîn jî projeyek şaristanî ya berfireh, "Neteweya Demokratîk", hildigire, ku modelek ji bo hevjiyana dadmend di navbera pêkhateyên etnîkî, olî û mezhebî yên herêmê û nêzîkatiyek alternatîf ji dewleta otorîter a kevneşopî re temsîl dike. Îmzekaran tekez kirin ku girtina Ocalan ne tenê binpêkirineke giran a mafên mirovan e, lê di heman demê de dûrxistina bi zanebûn a dengekî ye ku dikare beşdarî danûstandinên aştiyê û vegerandina mafên gelê Kurd bibe. Wan bal kişandin ser serkeftina rêveberiya xweser li Bakur û Rojhilatê Sûriyeyê, ku ji bîrdoziya wî îlham girtiye, wekî modelek alternatîf ji bo avakirina civatek mirovî û demokratîk. Înîsiyatîfê bang li rewşenbîr, nivîskar û çalakvanên Ereb kir ku beşdarî kampanyaya cîhanî bibin ku daxwaza rakirina tecrîda li ser Ocalan dike di bin dirûşmeya "Ez dixwazim bi Ocalan re hevdîtin bikim." Her wiha wan bang li rewşenbîr, nivîskar û çalakvanên Ereb kir ku daxuyaniyê îmze bikin, û piştgiriya xwe ji bo mafê wî yê ku dengê xwe bide bihîstin û beşdarî pêvajoyek danûstandinê bibe ku bi dawî li pevçûnên dehsalan bîne û ji bo Ereb û Kurdan pêşerojek hevpar ava bike, piştrast bikin. Di navnîşa îmzekaran de hejmareke mezin ji kesayetên siyasî û rewşenbîrî ji Misir, Filistîn, Sûdan, Iraq, Lubnan, Tunis, Sûriye, Yemen û Urdunê hebûn, di nav de serokên deh partiyên Ereb, akademîsyen, balyoz û kesayetên medyayê û mafên mirovan ên navdar. Di dawiya daxuyaniyê de hat destnîşankirin ku azadiya Abdullah Ocalan yek ji şertên bingehîn ên avakirina Rojhilata Navîn a nû ye ku li ser bingeha lihevhatin, jiyana hevbeş û rûmetê ye, dûrî dûrî tecrîd û xudperestiyê.

ANHA