Hozanekî xwezan; Comerd

Pêncşem 27 Adar 2025 - 02:45

Hozan Comert albûmeke nû ya bi navê “Xozan” derxist. Hozan Comerd got, “Dema ku em helbestvanên xwe yên sûfî dixwînin, em felsefe, trajedî û destanan dibînin. Min xwest ku felsefe û hunera wan bi muzîkê re bigihînim hev.”

FIRAZ BARAN / KOLN

Bavê şehîdan, hunermendê Kurdistanê Comerd, albûma xwe ya nû derxist. Navê albûmê “Xozan” e û gotinek bi Dimilî ye. Ji gotinên "xwe" û "zan" tê û wateya wê "xwe bizane" ye.

Di albûmê de 10 stran cih digirin. Hunermend helbestên Melayê Cizîrî, Melayê Batê, Pertew Begê Hekarî û Seydayê Tîrêj hilbijartiye. Albûmek taybet e. Bi maqama kasîdeyê û helbestên sûfî hatiye amade kirin û guhdar bi 14 enstrumanên cuda têrî muzîkê dibin. Aranjorê albûmê Hakan Akay e û amadekirina albûmê du sal kişandiye.

Albûma "Xozan"ê Art Recordsê derxistiye. Hozan Comerd dê roja Şemiyê beşdarî Newroza Frankfurtê bibe. Ew ê albuma xwe li vir li standa Art Recordsê îmze bike. Cîhana îro êdî albûm wek kaset û CD nayên derxistin. Mirov bi QR Code guhdar dike. Ji bo albumê pirtûkek bêrîkê hatiye amadekirin. QR Code û gotinên stranan di vê pirtûkê de cih digire.

Ji ber ku hin helbestên albûmê beriya sedsalan hatiye nivîsandin, îro hin gotin nayên fêmkirin. Di pirtûka bêrîkê de hem helbestên orîjînal û hem jî guhertoya wê ya ku li gorî kurdiya îro hatiye adaptekirin cih digire. Her wiha amadekaran helbestan wergerandine îngilîzî jî.

Maqama Kasîdeyê û Helbestên Sûfî

Hozan Comerd heyranê wêjeya sûfî û muzîka kasîdeyan e. Ev albûm nîşaneya vê heyraniyê ye. Hunermend ji ajansa me re axivî û got: "Dema ku em helbestvanên xwe yên sûfî dixwînin, em felsefe, trajedî û destanan dibînin. Min xwest ku felsefe û hunera wan bi muzîkê re bigihînim hev. Mesela min Ehmedê Xanî 4 caran xwendiye. Dîsa jî ez têr nebûm e. Divê mirov wê ezber bike. Helbestên kesên wek Melayê Cizîrî û Melayê Batê pir kûr in. Carinan tenê peyvek we digihîne cîhanek cuda."

Hozan Comerd dewam dike û van agahiyan dide: "Min xwest ku feylesofên me fahm bikim. Lewma em demeke dirêj bi hevalên muzîkjen re xebitîn. 2 sal in em li studyoyê ne. Me xwest em muzîkeke dewlemend û hêjayî felsefeya wan bi dest bixin. Me li stûdyoyê ji xwe re tenê muzîk çênekiriye. Me gotinên wan nirxandin, carinan bi saetan li ser peyvekê em axivîn. Nirxên gelê me ye. Em bi wêje û feylesofiya wan serbilind in."

Divê muzîk layiqî nirxên me be

Hozan Comerd, bavê şehîd Sînan Cemgîl Kahraman û Taylan Kahraman e. Bavê şehîdan herî dawî got: "Bi salan e em ji bo hewcedariyên rojane baz didin. Em diçin bîranîn, şahî û pîrozbahiyan... Ji ber vê yekê min nekarî wextê pêwîst bidim wêjeya tesewuf, tevî ku min pir jê hez dikir. Ev albûm lêborînek e ji wê hezkirinê re. Her wiha em mirovên çand û hunerê ne. Erkên me bilind kirina morala gelê me ye. Em êş û kêfxweşiya gelê me tînin ziman.

Yek jî Kurdistan ev 40 sale di nav tofanekê de derbas dibe. Me bi deh hezaran şehîd dan. Şehîdên me gelê me parastin û em kirin yek. Felsefeyek mezin derket holê. Vê felsefeyê gelê me parast û em bûn yek. Di vê albûmê de yek ji tiştên ku me herî zêde bala xwe dayê ev bû: Me hewl da ku em muzîkek layiqî van nirxan bikin. Êdî albûm dê di destê guhdaran de be. Ew ê xebatên me binirxînin. Ez hezkirin û rêzdariya xwe pêşkêşî gelê me dikim."

Stranên Albûmê

Stranên ku di albumê de cih digirin ev in:

Dil ji Min Bir

Gotin: Meleyê Cizîrî

Muzîk: Xozan Comerd

Hezar Hezar Sal û Zeman

Gotin: Rezaliyê Reşîd

Muzîk: Xozan Comerd

Bejna şepal

Gotin: Pertew Begê Hekarî

Muzîk: Xozan Comerd

Husna Te