Heta azadiya fîzîkî wê kampanya bidome

Berdevka TJK'yê Ayten Kaplan diyar kir ku kampanya "Ji Abdullah Ocalan re Azadî, Ji Pirsgirêka Kurd re Çareseriya Siyasî" li hemû welatên Ewropayê ketiye nava liv û tevgerê û diyar kir ku heta azadiya fîzîkî ya Abdullah Ocalan pêk bê dê kampanya bidome.

Kampanyaya “Ji Abdullah Ocalan re Azadî, Ji Pirsgirêka Kurd re Çareseriya Siyasî” ku ji aliyê gelê Kurd û dostên wan ve di 10’ê Cotmeha 2023’yan de hatiye destpêkirin, dewam dike. Kampanyaya ku ji bo azadiya fîzîkî ya Rêberê Gelê Kurd Abdullah Ocalan hatiye destpêkirin, li welatên Ewropayê hê jî rojane didome. 

Berdevka TJK-E'yê Ayten Kaplan li ser rewşa heyî ya kampanyaya "Ji Abdullah Ocalan re Azadî, Ji Pirsgirêka Kurd re Çareseriya Siyasî" axivî.

 Xwedîderketina li bangê

Ayten Kaplan diyar kir ku di çarçoveya kampanyaya "Ji Ocalan re Azadî, Çareseriya Siyasî ya Pirsgirêka Kurd" di 10'ê Cotmeha 2023'yan de di bin pêşengiya tevgera jinên Kurd de xebat meşandine û got, "Me gelek rojên xwendinê, panel û gelek çalakiyên kolanan û çalakiyên danasîna paradîgmaya Rêbertiyê li dar xistin." Ayten Kaplan, anî ziman ku bi taybetî jinan di çarçoveya kampanyayê de çalakiyên xwe pêk anîn û got, "Hem di warê paradîgmaya jinê ya Rêbertiyê û hem jî ji aliyê îdeolojiya azadiya jinê ve pêşandan hatin kirin. Di vê çarçoveyê de heta roja îro hatiye. Di demên dawî de gelek kesên ku Xelata Nobelê ya aştiyê wergirtine, piştgirî dan vê bangawaziyê û îmze avêtin vê bangê. Bi banga civaka demokratîk re bangek mezin hat kirin. Me bi hemû çalakiyên xwe yên 8'ê Adarê banga xwedîderketina li vê banga Rêbertiyê kir."

Heta azadiya fîzîkî wê kampanya bidome

Ayten Kaplan bal kişand ku kampanya li hemû welatên Ewropayê ketiye jiyanê û wiha got: "Tevgera jinan li gelek deverên Ewropayê bi taybetî li Swîsre, Fransa, Elmanya, Belçîka, Hollanda û Awûstûryayê xebatên xwe dimeşîne. Civînên jinan hene, lêkolînên li ser jin wê çawa bibin şirîkên vê pêvajoyê dewam dikin. Lê heta azadiya fizîkî ya Rêbertî pêk were ev tevger wê bidome. Di vî warî de heta ku bangawazî cihê xwe bigre û şert û mercên Rêbertî pêk neyên wê ev tevger bidome. Ev tevger bi hevalan re mezin bû. Paradîgmaya Rêbertiyê weke alternatîfa pergala heyî tê dîtin."

JINNEWS/STENBOL