Goristan nîşaneya hevgirtinê ne

Nûnerê eşîrên El Sade El Eşarif li Sûriye û Iraqê Hisên El Sade têkildarî gotinên kîndarî nefretê ku li dijî Herêma Bakur û Rojhilatê Sûriyeyê bi taybetî li dijî QSD û Rêveberiya Xweser zêde bûne axivî. Hisên El Sade diyar kir ku hin kesên li derve yên ku xwe wekî berpirsên eşîrên Ereban nîşan dide bi rêya medyaya dîjîtal hewl didin li Bakur û Rojhilatê Sûriyeyê fitneyan derxin, lê ev kes bi tu awayî nûnertiya eşîran nakin. El Sade destnîşan kir ku eşîrên li herêmê ji salan ve bi hev re dijîn û tu kînên kesî li hember ê din tune ye û got:"Ger kîn û nefret hebûna goristanên şehîdan ku hemûyan hembêz dikin tune bûn. Goristanên şehîdan nîşaneya hevgirtin û hezkirinê di nava şêniyên herêmê de ye." El Sade peyamek da kesên gotinên kîndariyê dikin û got:"Pêdiviya Sûriyeyê bi gotinên hezkirin û aştiyê heye. Çima hûn ji Sûriyeyiyan re nabêjin ji hev hez bikin da ku em ji nû ve Sûriyeyê ava bikin. Bes xwînrijandin û fitne, bes e karên di odeyên tarî de. Divê Sûriyeyî ji bo ji nû ve avakirina welatê xwe hevgirtî bin. Divê em nakokiyên xwe bidin aliyekî û berjewendiyên Sûriyeyê di ser hemû berjewendiyên takakesî, mezhebî û partiyetê re bigirin."

Hisên El Sade destnîşan kir ku Rêveberiya Xweser û QSDˊê ji zarokên eşîrên Ereb, Kurd û Xiristiyan pêk tê û got:"Qenciya Kurdan li ser me heye. Dema Yekîneyên Parastina Gel (YPG) ji aliyê Kurdan ve hat avakirin, li ser bingeha girêdana etnîkî yan mezhebî tev negeriya, li ser bingeha xwişk û biratiyê tev geriya û ji Ereban xwest tevlî bibin. Me bi hev re Rêveberiya Xweser û herêmên xwe ava kirin. Me ji tevahî cîhanê re îsbat kir ku em ava dikin hilnaweşînin û xebata hevbeş a di nava pêkhateyan de rêbaza pêşxistina herêman û pêkanîna îstîqrarê ye."

Nûnerê eşîrên El Sade El Eşarif li Sûriye û Iraqê, Hisên El Sade di dawiyê de diyar kir ku siberoja Sûriyeyê di diyaloga berfireh a navbera tevahî Sûriyeyiyan de ye û got:"JDema em wek Sûriyeyî diyalogê dikin, em ê bigihînin çareseriyekê."

ANHA/HESEKÊ