Derhêner Alî Kemal Çinar piştî çêkirina gelek kurtefilm û metrajdirêjan vê carê bala temaşevan û xwînerên xwe dibe ser xêzeromanê. Wî beriya niha jî filmekî metrajdirêj yê bi navê “Gênco” çêkiribû û ev filmê wî li gelek festîvalan hatibû nişandan. Her wiha gelek xelatan jî wergirtibû.
Alî Kemal Çinar xêzeromana xwe ya bi navê “Gênco” jî weke berdewamiya film pênase dike. Senaryoya li ber destê xwe nake film lê bi awayekî xêzeroman çap dike. Xêzeromana “Gênco” xwe dispêre serpêhatiyên lehengekî super, lehengê tiştên ji rêzê. Xêzeroman ji Weşanên Dara’yê derçû ye.
Li pişt pirtûkê ev agahî hene;
‘Di salên dawîyê de min pirtûkeke wisa nexwendî bû, hêvî dikim çareke din pirtûkeke wisa dernekeve.’
New Amed (rojname)
‘Hûn ê vê pirtûkê ji destê xwe bernedin ji ber ku di berga pirtûkê de mezelox heye.’
Xelîl Ronî (nivîskar)
‘Min dema Gênco nas kir xew li min herimî, ez ditirsim Gênco ji nişkê vê ji derekê derkeve pêş min.’
Berîvan Spî (rojnameger)
‘Ji vê pirtûkê bi dûr bikevin.’
Sala Dawî (hunermend)
‘Rojekê min pirtûkek xwend û jiyana min guherî, lê ew ne Gênco bû.’
Hêja Qayil (bijîşk)
Alî Kemal Çinar kî ye?
Li Amedê hate dinyayê. Di sala 2004an de kurtefîlmê xwe yê yekemîn kişand. Bi tevahî derhêneriya deh kurtefîlman kir û sinaryoyên wan nivîsandin. Di 2013an de yekemîn filmê xwe yê metrajdirêj kişand ku di bin bandora tecrubeyên kurtefîlmên wî de mabû. Filmê Veşartî ku di 2015an de kişand, di 15emîn Festivala !f İstanbul de “Xelata Fîlmê Herî Baş” û di beşa SIYADê de jî dîsa “Xelata Fîlmê Herî” Baş stand. Heman fîlmî di 28emîn Festîvala Queer ya Hamburgê de Xelata Juriyê ya Mezin wergirt. Di 2017an de bi navê Gênco sêyemîn fîlmê xwe yê metrajdirêj kişand û di 28emîn Festîvala Fîlman a Navnetewî ya Ankarayê de “Xelata Fîlmê Herî Baş” bi dest xist. Di sala 2018an de bi fîlmê Di Navberê De ji Pêşbirka Netewî ya 2018an Xelata Jurîyê ya Taybet û ji 5emîn Festivala Duhokê ya Navnetewî ya Fîlman jî “Xelata FIPRESCI” stand. Di 2019an de bi navê Berîya Şevê fîlmek din jî çêkir. Ali Kemal Çinar hê jî fîlman dikişîne.
NAVENDA NÛÇEYAN
