Di Pirtûkxaneya Navendî ya Zanîngeha Silêmaniyê de firoşgehek pirtûkan hate vekirin. Rêveberê pirtûkxaneyê got: “Pirtûkxane dê bibe navendek ji bo danûstandina agahiyan û firotina pirtûkên ku ji hêla Zanîngeha Silêmaniyê ve hatine çapkirin.”
Wek beşek ji Pirtûkxaneya Navendî ya Zanîngeha Silêmaniyê, pirtûkxaneyek bi sernavê ‘Pirtûk ji cîhanê re sirên xwe dibêjin’ hate vekirin.
Rêvebera Pirtûkxaneya Navendî û Çapxaneya Zanîngeha Silêmaniyê Terîfe Omer di merasîmê de gotarek pêşkêş kir û got: “Me li Pirtûkxaneya Navendî ya Zanîngehê pirtûkxaneyek vekir ku dê bibe navendek ji bo danûstandina agahiyan û firotina pirtûkên ku ji hêla Zanîngeha Silêmaniyê ve hatine çapkirin. Armanca me ewe ku di navbera zanîngeh û civakê de têkiliyek çêbibe û her wiha çandeke xwendinê ji bo xwendekar û akademîsyenan ava bibe. Fikra vê navendê ya Profesor Dr. Îbrahîm Mihemede ku ew pêşkêşî Zanîngeha Silêmaniyê kir. Piştî hinek astengiyan, ev proje ji aliyê Seroka Zanîngeha Silêmaniyê Dr. Kosar Mihemed ve hate bicîh anîn.”
Proje bal dikşîne ser xwendinê
Terîfe Omer wiha domand: “Armanca me ewe ku zanîngeha dayik (Silêmanî) bibe çapxaneyek, pirtûkxaneyek modern û şaneyek ji bo firotina berhemên zanistî û akademîk. Raste pirtûkxaneyên dîjîtal xwendina pirtûkan kêm kirine. Ev proje rêyeke ji bo balkişandina ser xwendinê.” Piştre xwendekarên Beşa Ragihandinê ya Zanîngehê belgefîlmek li ser dîroka Pirtûkxaneya Zanîngeha Silêmaniyê pêşkêş kirin. Her wiha ji aliyê xwendekarên beşa Hunerê ve hejmarek parçeyên mûzîkê hatin pêşkêşkirin. Heîr dawî Dr. Kosar Mihemed xelata rêzgirtinê da bijîşkên ku xizmeta Zanîngeha Silêmaniyê kirine.
ROJNEWS/SILÊMANÎ
parvê bike
Nûçeyên ku dikare bala we bikşîne
