Em xwe erkdar dibînin

Bi boneya 4’ê Nîsanê roja Rojbûna Rêber APO, Komîteya Azadî ji bo Ocalan ya li Başûrê Kurdistanê daxuyaniyek hate dayîn.

Di daxuyaniya ji aliyê endamê komîteyê Siware Mehmud ve hatî xwendin de, ev tişt hatin gotin:’’Îro 4’ê Nîsanê rojbûna bîrmendê mezin yê gelê me, birêz Abdullah Ocalan e. Îro rojbûna Rêberek ku jiyana me ve bi ramana azadiyê tije kiriye, hêza zanîn û têgihiştinê daye me û rêya evîn û heqîqetê ya jiyana azad nîşanî me daye. Gelê me vê rojê weke roja vejîna neteweyî, azadî û demokrasiyê binav dike. Bi taybet jin vê rojê weke pîroz û taybet dibînin û weke roja bilindkirina azadiya jinê binav dikin. Îro rojbûna Rêberê ku ji bo azadiya gelê Kurd, azadiya jinê, azadiya gelên Rojhilata Navîn û heta ji bo mirovahiyê gelek êş kişandiye ye. Îro ne tenê ji bo gelê Kurd, ji bo hemû gelên herêmê rojek watedar û giring, xwedî pîvana jiyana azad, demokratîk û birûmet.

Rêbertiyê ji mirinê zîndî kir

Di dîroka nêz û ya dûr de pir kêm kesan bi raman, tez û dîtinên xwe yên cîhanê li pirsgirêka jiyan, hebûn û azadiyê xwedî derketine. Nimûneyên wan ên ku bi zayîna aqil û hişê xwe re rêya jiyan û hebûna xwe guherandine pir hindikin. Rêber Ocalan ew Rêberê ku ji dayîkbûnê ve taybetmendî û têgînên bi vî rengî yên jiyanê û têkiliyan hilgirtiye. Ji bo rêheval, heval û derdorên xwe bûye rêber, çavkaniya hêviyê û hêza hevpar. Ev têgeh û taybetmendî piştre ji bo gelê Kurd ku di tarîtiya dagirkeriyê de û di bin şert û mercên dijwar û bêrehm ên dijminên gelê Kurd de êş û azar kişand, piştre bûn hêza guhertin û veguhertinê. Rêber Ocalan ev gelê ku li ber mirinê bû ji nû ve zindî kir û carek din ruh berda ser, bi rêxistin kir û xist qada şerê têkoşîna azadiyê. 

Banga dîrokî bigîhînin serketinê

Di hem wextê pîrozkirina salvegera rojbûna Rêber Ocalan de, em di qonaxeke girîng û hestiyar de derbas dibin. Ev jî piştî peyam û banga dîrokî ya Birêz Ocalan a bi navê ‘Aştî û Civaka Demokratîk’ tê. Em weke Komîteya ‘Azadî ji bo Ocalan’ vê peyamê weke ji nû ve dayîkbûna Rêber Ocalan bi nav dikin. 

Ji ber vê yekê em weke Komîteya ‘Azadî ji bo Ocalan’, li gel pîrozkirina rojbûna Birêz Ocalan, em xwe erkdar dibînin ku peyam û banga aştî û civaka demokratîk bigihînin serkeftinê, emê vê qonaxa girîng bi berpirsyarî ragihînin. Di heman demê de ji bo azadiya fîzîkî ya Rêber Ocalan û xwedîderketina li êş, fikir û felsefeya wî em bi israrin ku kampanya û têkoşînê mezin bikin.

ROJNEWS/SILÊMANÎ