Divê xwedî li bangê derkevin

Di derbeya leşkerî ya 1980’an de Eşref Anyik, Mahmut Zengin, Necmî Oner û Ferhat Kurtay li Girtîgeha Amedê li dijî îşkence û pêkanînên dijmirovahî bedena xwe dan ber agir. Ev navên ku di girtîgehê de pêşengiya berxwedanê kirin bi navê “Çaran” ketin nava rûpelên dîrokê. Birayê Ferhat Kurtay Mehmet Ferît Kurtay ku wê demê bi Ferhat Kurtay re di girtîgehê de bû, der barê bûyer û pêvajoya wê demê de axivî. Kurtay diyar kir ku dema birayê wî Ferhat Kurtay çalakiya xwe li dar xistiye, ew bi xwe di hucreya 31’emîn a ku kadroyên pêşeng ên PKK’ê lê dihatin girtin de bûye û got:“Dema ku Ferhat, Mazlum, Hayrî , Kemal  çalakiyên xwe pêk anîn, gotin, ‘Bila gelê me û zarokên me azad bijîn.' Ji bo ku zarokên kurd azad bijîn ev çalakî li dar xistin. Armanca wan ew bû ku biratî, azadî û bedewî bû. Ji bo ku kurd bên naskirin, çalakiya xwe kirin. Jixwe Kurdan ti carî dest ji vê xakê bernedane û li vir bûne. 100 sal in gelek tişt guherîn. Lê piştî vê saetê jî divê êdî xwîn nerije. Lewma em aştî û biratiyeke mayinde û pêvajoyeke ku kurd xwe tê de dibînin dixwazin. Em dixwazin ev şer bi dawî bibe."

Beriya hertiştî girtî bên berdan

Kurtay da zanîn ku ew wekî kurd bi hemû hêza xwe piştgiriyê didin banga Rêber APO û got:"Dewlet gavan navêje jî, em ê ji vê asta ku gihîştine paşde gav navêjin." Kurtay hestên ku di roja xwendina banga Rêber APO de lê peyda bûne anî ziman û got:"Min ji xwe re fikirî ku di salên 1983, 1993 û 2015'an de pêkan bû ku pêvajo bigihêje vê qonaxê. Lê belê ji ber kesên şerxwaz pêk nehat. Lê vê carê hêviya me heye. Di vê pêvajoyê de çi bikeve ser milê me em ê bikin. A rast tu hêviyek me ji dewletê tune ye.  Ger em tişta dikeve ser milê me bikin, wê dewlet mecbûr bimîne gavê bavêje." Kurtay bi bîr xist ku rojeva Tirkiyeyê ya niha banga Rêber APO ye û got ku desthilat bi operasyonên li dijî CHP'ê hewl dide rojevê berovajî bike û wiha dewam kir:"Tişta ku divê li dijî vê bê kirin ew e ku zêdetir piştgirî bidin bangê. Dema ku ev bang bê destekkirin û ev piştgirî mezin bibe, neçar e ku dewlet gavan biavêje. Dema ku em çi hewce be bikin wê dewlet jî bike. Beriya her tiştî girtiyên nexweş hene. Divê serbest bên berdan. Divê hemû girtî serbest bên berdan."

MA/AHMET KANBAL