Divê qedexeya li ser PKK'ê rabe

Hevseroka KON-MED'ê Rûken Akça qedexeya 32 salan a li Elmanyayê ya li ser PKK'ê bi bîr xist û got, "Ev qedexeya ku bandoreke neyînî li mafên sivîl, çandî û demokratîk ên civaka Kurd dike divê jinûve bê nirxandin."

Bi biryara sala 1993'yan a Wezîrê Karên Hundir ê Elmanyayê yê wê demê Manfred Kanther re li PKK'ê hate qedexekirin ku komeleyan ava bike û kar bike. Piştî qedexeyê li hemberî civaka Kurd polîtîkayên krîmînalîzasyonê ketin meriyetê. Komeleyên Kurdan hatin girtin, Kurdistanî hatin binçavkirin û darizandin. Ji ber rewşa neyînî ya qedexeya li ser PKK'ê, têkildarî dozên Kurdên hatin kuştin jî lêpirsîneke bi bandor nehate meşandin. Li gel ku PKK'ê bi Kongreya 12'emîn a navbera 5-7'ê Gulana 2025'an re xwe fesix kiriye, qedexeya li Elmanyayê û kiryarên ji ber vê qedexeyê hîn jî dewam dike.

Hevseroka Konfederasyona Komeleyên Kurd a li Elmanyayê (KON-MED) Rûken Akça axivî û bi bîr xist ku qedexeya li ser PKK'ê ya ku 32 sal in di meriyetê de ye ji aliyê civakî, çandî û siyasî ve bandoreke berfireh li civaka Kurd a li vî welatî dike. Rûken Akça got, "Li gorî nirxên demokratîk, pîvanên azadiya fikrî û nêzîkatiya li aştiya civakî ya Ewropayê, divê kiryarên heyî li gorî şert û mercên nû jinûve bê nirxandin."

Rûken Akça anî ziman ku li Elmanyayê nêzî 2 milyon Kurd hene; civaka Kurd girîngiyeke mezin dide saziyên demokratîk, dewleta hiqûqê û feraseta pirrengî ya li Elmanyayê. Rûken Akça destnîşan kir ku ji ber vê yekê daxwazên demokratîk divê neyên krîmînalîzekirin, li şûna wê divê diyalog û perspektîfên çareseriyê li pêş bin û got, "Civaka Kurd parçeyek ji Elmanyayê ye."

Hevseroka KON-MED'ê Rûken Akça bendewariya ji Elmanyayê bi vî rengî anî ziman:

* Beriya her tiştî qedexeya 32 salan li gorî rewşa nû û heyî jinûve bê nirxandin.

* Li gel vê yekê kiryarên ku bandoreke neyînî li mafên sivîl, çandî û demokratîk ên civaka Kurd a li Elmanyayê dikin di ber çavan re bêne derbaskirin.

* Elmanya û Tirkiye xwedî têkiliyê aboriyê yên kûr in. Dewamiya şerê li Tirkiyeyê bandoreke neyînî li van têkiliyan dike. Ji ber vê jî divê Elmanya aştiya civakî, diyaloga demokratîk û xurtkirina atmosfera bêşer teşwîq bike, polîtîkayeke di vê çarçoveyê de bimeşîne.

* Elmanya dewletek e ku mohra xwe daniye binê Peymana Mafên Mirovan a Ewropayê (PMME). Di çarçoveya pîvanên azadiya rêxistinî û azadiya fikrî ya PMME'yê de divê nêzîkatiyeke tevgir bipejirîne.

ANF/BERLÎN