Divê Ocalan bi azadî biaxive

Sekreterê Giştî yê Partiya Sor Onur Emre Yagan têkildarî Pêvajoya Aştî û Civaka Demokratîk ku piştî banga dîrokî ya  Rêber APO destpê kiribû û komîsyona li Meclisê hatiye avakirin, axivî. Yagan, bal kişand ser rola diyarker a Rêber APO a di çareseriya pirsgirêka Kurd de û got ku ji bo pêvajoya bi tendurist bidome, divê mercên xebateke azad a Rêber APO bên avakirin. Yagan, diyar kir ku Partiya Sor çareserkirina meseleya Kurd weke pêwîstiyekê dibîne û got:“Hewceye xwişk-biratî û jiyana demokratîk a di navbera gelên Tirkiyeyê de xurt bibe. Siyasetmedarên rastgir piranî vê meseleyê bi kar tînin û Kurdan weke dijmin nîşan didin. Divê ev rewş ji holê rabe. Em sosyalîst ku ji guherandina îktîdarê berpirsyar in, têkoşîna hevpar a sosyalîst a kedkarên Kurd û Tirk diparêzin. Lê hebûna pirsgirêka Kurd dike ku feraseta neteweperest vê qadê ji bo kedxwariyê bi kar bîne.” 

Divê civak xwedî li aştiyê derkeve

Yegen bi bîr xist ku piştî banga Rêber APO du gavên şênber hatine avêtin û got:“Yek ji van biryara xwefesixkirin û çekberdanê ya PKK’ê û ya din jî avakirina komîsyona li Meclisê ye. Weke ku çareserî tenê li Meclisê dikare bibe tê nîşandan lê ev xelet e. Dibe ku komîsyon gavekî erênî be lê kêm e. Ji ber ku civak çiqasî xwedî li aştiyê derkeve, dikare ewqas bi ser keve. Divê komîsyon bi xwe jî di bin venêrînê de be. Pêvajoyeke ku tenê çendek mirov dizanin çi diqewime dibe ku were sabotekirin. Ji bo ev nebe jî divê komîsyon piştgiriya qada civakî bigire. Divê Abdullah Ocalan di şert û mercên baştir de bikare xwe îfade bike. Ya din jî em dixwazin rêxistinên jinan bibin hêmayeke çalak a pêvajoyê.” 

Hem gef hem aştî çênabe 

Yegen destnîşan kir ku ji bo pêvajo veguhere çareseriyê divê Tirkiye statuya Rêveberiya Xweser a Bakur û Rojhilatê Sûriyeyê nas bike û got:“Mimkin nîne Tirkiye li rexekî gefê li ewlehiya Kurdan, Durziyan û Elewiyan bixwe û li rexa din li vir çareseriyê pêş bixe. Divê hêzên pêşverû, şoreşger jî bibin parçeyeke pêvajoyê. Divê girtiyên siyasî yên Kurd bên berdan, bi hezaran gerîla bibin parçeyeke pêvajoyê, divê dewlet ji bo gerîlayan yasa û mekanîzmayan ava bike. Pozîsyona me ne ew e ku em bêşert piştgiriyê bidin tevgera siyasî ya Kurd lê divê di mijara çareseriya pirsgirêka Kurd de em berpirsyartiya şoreşgerî li xwe bigirin. Em mecbûr in li dijî rêxistinên dijbertiya li dijî Kurdan sor dikin jî têbikoşin.”

MA/MELÎK ÇELÎK