Divê mirovahî Ocalan biparêze

• Parêzerê ji baroya Romayê yê ku parêzeriya Ocalan kiriye, Mario Antonio Angelelli dibêje, “Pêwîst e mirovahî vî mirovê hêja biparêze. Ocalan mifteya gelan e da ku bigihîjin aştiyê.”

EYLEM AKDAG-RÛKEN POLAT/ MA / AMED

Li dijî tecrîda girankirî ya li ser Rêberê PKK’ê Abdullah Ocalan şandeyek navneteweyî ku ji 36 kesan pêk dihat û ji 7 welatên cuda bûn, bi navê “Delegasyona Navneteweyî ya Li Dijî Tecrîdê” hatin Amedê, Stenbolê û Enqereyê. Endamên Delegasyonê di navbera 25-27’ê Çile de li gel nûnerên rêxistinên sivîl û partiyên siyasî hevdîtinan kirin.

Endamê Baroya Romayê parêzer Mario Antonio Angelelli di pêvajoya komploya navneteweyî ya 15’ê Sibatê de li Îtalyayê bû û wî parêzeriya Ocalan dikir.

Mario Antonio Angelellî derbarê şikandina tecrîdê de nirxandin kirin û got; “Divê têkoşîn bidome, qala tecrîdê bê kirin, li dijî tecrîdê weke parêzerên saziyên Îtalya û Ewrûpayê xebat bên meşandin. Divê Abdullah Ocalan mafên xwe yên mirovî bi kar bîne. Pêwîst e beşdarî pêvajoya azadî û aştiyê bibe. Ocalan nûnerê gelê Kurd e û mifteya aştiyê ye.”

Ramanên Ocalan tên tecrîdkirin

Angelellî derbarê paradîgmaya Rêber Abdullah Ocalan de jî got;

“Min pirtûkên Ocalan xwendine. Ew îhtîmala cîhaneke dadperwertir, aştiyane û dewlemendtir pêşkêş dike. Divê ku ew azad bibe, fikrên wî azad bibin. Lê belê Ocalan di nava şert û mercên ku bi parêzer û malbata xwe re nîne tê girtin. Ev ne azadiya ramanê ye. Em beriya her tiştî azadiya wî dixwazin. Lê azadiya ramanên wî di van şert û mercan de ne pêkan e. Ez difikirim ku fikrên wî ji bo gelên cîhanê girîng in.” 

Hukûmet ne gel in li pey berjewendiyan e

Mario Antonio Angelelli derbarê bêdengiya civaka navnetewî ya li hemberî Ocalan de jî got; “Ji ber ku hikûmet ne gel in. Ji ber ku hikûmet li berjewendiyên aborî digerin. Zexta komên ku li berjewendiyên aborî dinêrin gelekî xurt e. Berjewendiyên van koman di nava kapîtalîzmê de girîng in. Yekem tişta ku difikirin berjwendî ye. Sedemên dewletan li gorî berjewendiyên van komên mezin in. Zehmet e ku meriv bersiva vê pirsê bide. Lê ew jî hêsan e. Ji ber ku hêz di destê wan kesan de ye ku li gorî berjewendiyên van koman tevdigerin. Ev berjewendî, ne berjewendiyên gelan e.

Li dijî bidawîkirina bêdengiyê jî Angelelli got; “Min got, girîng e têkoşîna li dijî zextên navneteweyî dewam bike. Kampanyaya navneteweyî pirr girîng e. Bi dîtina min girîng e ku civaka navneteweyî li dijî girtina 24 salan seferber bibe. Gelek kes difikirin ku Ocalan, Mandelayê nû ye. Divê ew jî wek Mandela beşdarî pêvajoya aştiyê bibe. Divê Ocalan bi xwe ji girtîgehê derkeve û fikrên wî bigihîjin civakê.”

Divê tecrîd baş were zanîn

Mario Antonio Angelelli di dawiya axaftina xwe de, derbarê dîplomasiyê de jî got; “Zext dikare bên kirin. Ji ber ku îro pirsgirêka herî mezin ew e ku mirov vê rewşê ji bîr dike. Divê rewşa tecrîdê baş zanibin. Pêwîst e di vê mijarê de raya giştî were agahdarkirin û hişyarkirin. Hewcehî pê heye ku ew karibe biaxive, danûstendinê bike, peyaman ragihîne. Pêwîst e mirovahî vî mirovê hêja biparêze. Ocalan mifteya gelan e da ku bigihîjin aştiyê.”