Koordînatorê Akademiya Ma Musîcê Şêrko Kanîwar li ser vekirina Dibistana Zarokan a Musîcê ya Egîdê Cimo ya li Stenbolê hat avakirin axivî. Kanîwar got ku pêwîst e li her derê Dibistanên Zarokan ên Ma Musîcê bên vekirin da ku zarokên kurd li dijî asîmîlasyonê bi zimanê xwe stranan bibêjin.
Kanîwar diyar kir ku wê zarokên di navbera 2 û 12 salî de li Dibistana Ma Musîcê ya Egîdê Cimo perwerdehiya muzîkê bidin û got ku perwerde wê bi Kurdî be. Kanîwar diyar kir ku dê û bav jî dikarin beşdarî perwerdeya zarokên 2, 3, 4 û 5 salî yên tên Dibistana Egîdê Cimo bibin û rola dê û bavan jî di pêvajoya hînbûnê de girîng e û got:"Ji ber ku em li vir hînî muzîka kurdî dibin, lê ger em li malê bi kurdî neaxivin, dê û bav muzîka kurdî ji zarokên xwe re lênexin, perwerdehiya li vir bêwate ye. Li vir ezmûn tên kirin ku ka zarokên li vir dikarin ji bin barê 75 saet rîtma muzîkê rabin. 6 salan perwerdehiyê dibînin. Du salên ewil perwerdehiya muzîka kurdî, perwerdehiya rîtmê, perwerdehiya bi zimanê kurdî û perwerdehiya govendê digirin. Di sala 2'an de zarok enstrumana xwe hildibijêrin. Û paşê hêdî hêdî koma orkestrayê çêdibe."
Gundê Zarok MA’yê
Kanîwar da zanîn ku Dibistana Ma Musîcê ya Egîdê Cimo wekî mekan ji bo perwerdehiyê ne cihekî guncaw e, lê armanca wan ew e ku di meha Hezîranê de gundê Zarok Ma'yê ku ji bo perwerdehiya pedagojîk a zarokan guncav e, ava bikin. Kanîwar got ku wê ji bo vê kampanyaya hevgirtinê bidin destpêkirin. Kanîwar da zanîn ku ji bo Dibistana Ma Musîcê ya Egîdê Cimo serlêdanên qeydkirinê zêde ne û ev 8 sal in li Stenbolê bi rêya hesabên medyaya sanal serlêdana vekirina dibistana Ma Musîcê tê kirin. Ji perwerdekarên Ma Musîcê Sarya Ertaşê jî bal kişand ser polîtîkayên asîmîlasyonê yên li ser kurdan û wiha got:"Kincên em li xwe dikin jî tehemûl nakin, lewma êrişên wan ên li ser ziman me matmayî nakin. Ger em qadên ku zarokên Kurd tê de karibin xwe îfade bikin ava nekin, wê polîtîkayên asîmlasiyonê zêde bibin. Sedema ku me vê dibistanê vekir jî zîndîkirina Kurdî ye."
MA/FERHAT SEZGÎN-MELÎK ÇELÎK
