Divê komîsyon guh bide Ocalan

Hevseroka Giştî ya Komeleya Hiqûqnasên Ji Bo Azadiyê (OHD) Ekîn Yeter Moray ku beşdarî merasîma îmhakirina çekan bû ku di 11'ê Tîrmehê de ji hêla Koma Aştî û Civaka Demokratîk ve li Şikefta Casenê ya bajarê Silêmanî yê Herêma Kurdistanê hat lidarxistin, derbarê xebatên komîsyonê de nirxandin kir.

Ekîn Yeter Morayê diyar kir ku piştî merasîma tunekirina çekan, komê ji wan re ragihandiye ku ew û rêxistinên civaka sivîl berpirsiyariyeke girîng li ser milê wan e û got:"Lîste radestî me hat kirin. Dema ku lîste radestî me hat kirin, ji me re hat gotin ku bendewariyek heye: 'Em vê lîsteyê radestî civaka sivîl dikin û em hêvî dikin ku civaka sivîl karê xwe bike.' Bi rastî, me hewl da ku vê mîsyonê, ku bi salan di gelek waran de bi hevkariya Komeleya Mafên Mirovan (ÎHD) dikin, bi cih bînin." Ekîn Yeter Morayê destnîşan kir ku bi pêşketina pêvajoyê re komîsyonek li meclisê hatiye avakirin, lê ev komîsyon tenê bi biryara meclisê hatiye damezrandin û bingehek wê ya qanûnî tune ye. 

Xebatên komîsyonê pir girîng in 

Ekîn Yeter Morayê girîngiya xebata komîsyonê destnîşan kir û got:"Me pêvajoyek dît ku bernameyek hilweşînê li seranserê avaniya civakî ya li Kurdistanê, nemaze di 10 salên dawî de, bicîh aniye. Em bi encamên giran ên vê pêvajoyê re rû bi rû man, di nav de mafên jinan, zarokan û aliyên ekolojîk û civaka sivîl. Ji ber vê yekê, vegotin û ravekirina vê pêvajoyê derfeteke mezin e ku mirov nîqaş bike ka em çawa gihîştine vê astê û ev pirsgirêk çawa dikare were çareserkirin." Her wiha Ekîn Yeter Morayê bal kişand ser guhdarîkirina baroya û rêxistinên hiqûqê û da zanîn ku neguhdarkirina OHD'ê kêmasiyeke mezin e û got:"Em behsa saziyeke rêxistinê ya mezin a li Tirkiye û Kurdistanê dikin. Negazîkirina wê nayê qebûlkirin." 

Muxatab Ocalan e

Ekîn Yeter Morayê îşaret bi pêwîstiya guhdarîkirina Rêber APO ya ji aliyê komîsyonê ve kir û got:"Em hemû dizanin ku aştî bi destê kesên ku şer dikin tê bidestxistin. Gelê Kurd, bi hemû mekanîzmayên xwe, bi salan e bi vê rastiya şer re rû bi rû ye. Û bêguman, heke di vê pêvajoyê de bi rastî aştî were sazkirin û heke derfet û îmkana avakirina civateke demokratîk hebe, divê pêşî birêz Ocalan ji aliyê vê komîsyonê ve were guhdarîkirin."

Ekîn Yeter Morayê destnîşan kir ku ji bo pêvajo pêş bikeve divê tecrîda li ser Rêber APO bê rakirin û got ku ew hiqûqnas ji bo vê wê di nava hewldanan de bin. 

MA/MELÎK VAROL