Divê ferzkirina poşmaniyê bê rakirin

Parlamentera DEM Partî ya Îzmîrê Burcugul Çubuk, çû serdana girtiyên jin yên li girtîgeha jinan a Şakranê. Burcugul Çubuk da zanîn ku lijne poşmaniyê ferz dikin û got:"Divê ferzkirina poşmaniyê bê rakirin. Kesê ku 30 salî girtî maye nabêje ez poşman im."

Tecrîda girankirî ya li ser Rêberê Gelê Kurd Abdullah Ocalan li girtîgehên din jî xwe dide der û dibe sedem ku binpêkirinên mafan berfireh bibin. Her çend di demên dawî de bi Abdullah Ocalan re hevdîtinên bi sînor hatin kirin jî, hîna jî tecrîd didome. Şert û mercên jiyana girtiyan bi taybetî li girtîgehên ewlekariya bilind ên tîpa S û Y ku weke girtîgehên bi tîpa baş tên binavkirin her ku diçe xirabtir dibe. Her wiha li gel ku Desteyên Îdarî û Şopandinê ji ber hincetên curbecur serbestberdana girtiyên ku dema berdana wan nêzîk dibe taloq dike, li ser esasê lêpirsîna “poşmaniyê” biryara girtinê didome.

Parlamentera Partiya Wekhevî û Demokrasiyê ya Gelan (DEM Partî) a Îzmîrê Burcugul Çubuk di navbera 8 û 21’ê Adarê de serdana girtiyên li Girtîgeha Jinan a Şakranê kir û binpêkirinên ku girtiyan ragîhandin nirxand.

Jin bi pêkanînên kêfî dijîn

Burcugul Çubuk got girtiyên jin 8’ê Adarê û 21’ê Adarê Newroz pîroz kirine û ji hemû jinan re silav şandine û wiha got: “Girtî pêvajoyê ji nêz ve dişopînin. Hinek pirsgirêk hene. Bi taybet di têketina girtîgehê de hinek pêkanîn bi pirsgirêk in. Mehtap Alîşan a wê pêvajoyê hatiye girtin alavê wê nedanê. 10 rojan alav nedane. Ger jinên din tunebûna wê ti tiştekî wê tunebûna. Girtiyên jin bi pêkanînên kêfî dijîn.” 

Poşmanî tê ferzkirin

Burgucul Çubuk her wiha destnîşan kir ku hucre nêzî pergala laximê ne û li van deran mişk digerin û got: “Li qawişan jî heman pirsgirêk hene. Me bi îdareyê re hevdîtin kirin û gotin wê çareser bikin. Di vê hevdîtinê de em fêr bûn ku hîna çareser nekirine. Îdareya girtîgehê her kesî ji ser guhê xwe davêje. Ji ber girtinan êdî cih li girtîgehan nemaye. Li Şakranê jî heman rewş tên jiyîn. Li ber tuwaletan jî nivîn hene. Her wiha pêvajoyên revîr û nexweşxaneyan jî bi pirsgirêk in. Şandina nameyan dibe hinceta ceza. Lijne poşmaniyê ferz dikin. Divê ferzkirina poşmaniyê bê rakirin. Kesê ku 30 salî girtî maye nabêje ez poşman im.”

JINNEWS/ÎZMÎR