Divê dewlet gavan biavêje

Bi ser “Banga Aştî û Civaka Demokratîk” a Rêber APO re ku di 27’ê Sibatê de hate ragihandin, 31 roj derbas bûn. Têkildarî banga ku li cîhanê deng veda, heta niha jî dewletê tu gav neavêtiye. Şaxên Komeleya Hiqûqnasên ji bo Azadiyê (OHD) û Komeleya Mafên Mirovan (ÎHD) ên Rihayê û Navenda Mafên Mirovan a Baroya Rihayê diyar kirin ku bang hêviyê dide û gotin ku divê dewlet tavilê gavan biavêje. 

Divê birêz Ocalan fizîkî azad bibe 

Hevserokê Şaxa OHD’a Rihayê Yasîn Aktaş diyar kir ku li dijî biryara agirbestê ya PKK’ê divê Tirkiye jî weke gava ewil agirbestê ragihîne û xwe ji Herêma Kurdistanê vekişîne û got:“Tevî pêvajoyê û daxwazan jî tecrîda girankirî didome. Ji bo pêvajo bi ser keve divê ji ewil birêz Abdullah Ocalan bikare bi parêzer û malbata xwe re hevdîtinan bike û piştre jî ji hêla fîzîkî ve azad bibe. Piştre jî divê girtiyên nexweş bên berdan. Piştre jî divê ji bo girtiyên siyasî qanûn were guherandin. Divê ji bo azadiya fîzîkî ya hemû girtiyên siyasî qanûn bên sererastkirin.” 

Berdana girtiyên nexweş 

Rêveberê Şaxa ÎHD’a Rihayê Serdil Îzol jî anî ziman ku peyama Rêber Abdullah Ocalan gelek biqîmet e û got:“Banga Ocalan pir zelal e. Peyamên hikûmet û partiyên din ên siyasî jî girîng bûn. Ji ewil divê ji bo berdana girtiyên nexweş bingeheke hiqûqî were amadekirin.  Divê bi destê darazê ev bêhiqûqtiyên mezin ji holê bên rakirin. Ji bo vê jî divê xebateke nû ya destûra bingehîn bê kirin.” 

Divê qanûn bên sererast kirin

Rêveberê Navenda Mafên Mirovan a Baroya Rihayê Ferhat Oldurur jî bi bîr xist ku piştî bangê PKK’ê jî agirbest ragihandiye lê tevî bi ser re mehek derbas bûye jî dewletê hêj tu gav neavêtiye û got:“Weke gava ewil divê birêz Ocalan ji hêla fîzîkî ve azad bibe. Ji bo vê jî divê di qanûnan de sererastkirin çêbibin. Di vê mijarê de biryara DMME’yê heye. Di biryara Hejmar 2’yê de Tirkiye qala ‘Mafê Hêviyê’ dike. Gava duyemîn jî rastiya qeyûman e. Divê dewlet di vê mijarê de jî gavan biavêje û di qanûnan de ji bo ‘hemwelatiya wekhev’ sererastkirinan bike. Divê ev destûra bingehîn, sivîl be. Hewceye daxwaza ji bo zimanê Kurdî jî bê cîbicîkirin. Girîng e ku gel jî daxilî vê pêvajoyê were kirin. Hiqûqnas dikarin di amadekirina destûra bingehîn a nû de cih bigirin. Ji ber ku navbeynkarên dewlet û girtîgehan hiqûqnas in.” 

MA/RIHA