Di cejnê de 42 rojnamevan girtî ne

Rojnamegerên çalakiyên protestoyî yên li dijî operasyona ser Şaredariya Bajarê Mezin a Stenbolê tên lidarxistin dişopandin jî bûn hedefa êrişan. Di navbera 19-23’yê Adarê de bi ser malên 13 rojnamegeran de hate girtin, 12 hatin binçavkirin û ji wan 7 jê hatin girtin. Piştre jî li ser îtîraza parêzeran hatin berdan. Seroka MKG’ê Roza Metîna têkildarî zextên ser rojnamegeran axivî. Roza Metîna, diyar kir ku desthilatdariya AKP’ê li dijî xebatkarên Çapemeniya Azad çoyê darazê bi kar tîne û got:“Dixwazin rojnameger paşvegavê biavêjin. Di esasê xwe de ev, teknîka serîtewandinê ye. Em jî bi bernedayina pênûs û kamerayên xwe bersiva herî baş didin van rêbazan.” 

Roza Metîna, destnîşan kir ku rojnamegerên jin cejnê di nava çar dîwaran de pêşwazî dikin û got:“Li gorî rapora komeleya me ya meha sibatê, niha 10 rojnamegerên jin bi awayekî neheq girtî ne. Ji ber ku nelirêtî, neheqî û zilm teşhîr kirin lewma di nav çar dîwaran de ne. Bi mezinkirina rêxistiniya xwe em dikarin rojnamegeriyê biparêzin û ji êrişan re bibin bersiv. Herî dawî em bûn şahid ku di protestoyên ji bo Ekrem Îmamoglû de rojnameger rastî tundiyê hatin, hatin binçavkirin. Lewma divê em rojnameger rêxistiniya xwe mezin bikin û ji heqîqetê tawîzê nedin. Bi hêzdayina hev em ê bikarin bibin bersiv. Em ji bo hemû rojnamegerên girtî daxwaza azadiyê dikin.” 

MA/AMED