Çalakiyên bibandor ên QSD-YPJ’ê

QSD'ê bîlançoya şerê li dijî dewleta Tirk a dagirker û çeteyên wê yên SMO eşkere kir. Li gorî vê yekê, 5 leşkerên Tirk birîndar bûn, wesayiteke leşkerî jî hate îmhakirin. Daxuyaniya Navenda Ragihandinê ya QSD'ê bi vî rengî ye:"Balafirên şer ên dewleta Tirk a dagirker şeva În/ Şemiyê derdora Bendava Tişrînê bombebaran kir. Di heman demê de herêm bi çekên giran hat topbarankirin. Dewleta Tirk a dagirker pêr sibeha jî gundê Xirbe Xalid bi obîsên giran topbaran kirin. Di encama topbaranê de zerarên madî gihiştin milkên şêniyan. Şervanên me li eniya Pira Qereqozaxê 3 çalakî  li dijî baregeha artêşa Tirk a dagirker û çeteyên wê ya li ser girê Qereqozaxê, baregeha li gundê Qebir Îmo li dar xistin. Di encama çalakiyan de birîndar û kuştiyên çeteyan çêbûn. Bi qasî hat tesbîtkirin 5 leşkerên artêşa Tirk a dagirker birîndar bûn û erebeyeke wan a leşkerî derb xwar.

Balafirên şer ên dewleta Tirk a dagirker gundên Tîna, Xeseq û Melhayê bombebaran kir. Di encamê de zerar li mal û milkên sivîlan bûn. Artêşa Tirk a dagirker û çeteyên wê gundên Tîna, Cade, Bîr Hiso, Xeseq, Dîkan, Melha, girên Sêvê û Qereqozaxê yên li başûrê Kobanê bi obîsên giran, moşek û tankan bi awayekî dijwar û ketober topbaran kirin. Ji ber topbaranê zerar li milkên şêniyan bû. Balafirên bê mirov ên bi çek di tevahiya rojê de li ser herêma Dêr Hafirê geriyan."

ANHA