Bi sedan gorên bênav hene

Li goristanên Şirnexê bi dehan endamên HPG û YJA-STAR'ê  yên li gorên bêkesan hatine definkirin hene. Daxwaza malbatên wan heye ku cenazeyên zarokên xwe bistînin lê dewlet di vê mijarê de astengiyan derdixîne.

Li navend, navçe, bajarok û gundên Şirnexê ji sala 2015'an ve cenazeyên 272 endamên HPG û YJA-STAR'ê ku li deverên cuda jiyana xwe ji dest dane, li gorên bêkesan hatine definkirin. Gelek malbatên ku bi salan e ji bo standina cenezayên zarokên xwe serlêdan kirine li bendê ne ku rayedarên dewletê bersivê bide wan.

Li ser goran tenê hejmar  hene

Li gor agahiyên hatine komkirin li navenda Şirnexê 130, li navçeya Qilebanê 47, li navçeya Cizîrê 2, li navçeya Elkê 5, li navçeya Hezex 21, li navçeya Silopya 67 cenazeyên endamên HPG û YJA-STAR'ê li goristanên van deveran hatine definkirin û li ser goran tenê hejmar hatine nivîsandin. Rêveberê Komeleya Yekitî Çand Piştevanî û Alîkariyê ya bi Malbatên Xizmên xwe li Dergûşa Şaristaniyê Windakirinê re yê Şirnex (MEBYA-DER) Jîhat Urgen derbarê mijarê de got ku li gel ku malbatan serlêdan kirine jî cenazeyên zarokên wan nayên dayîn.

Dewlet astengiyan derdixîne

Jîhat Urgen da zanîn ku malbatan ji bo cenazeyê zarokên xwe bistînin mînaka xwînê dane û wiha axivî; “Bi sedan cenaze li Şirnexê di gorên bêkesan de hatine definkirin û daxwaza malbatên wan heye ku cenazeyên zarokên xwe bistînin lê dewlet di vê mijarê de astengiyan derdixîne.”

AW/ŞIRNEX/NEDÎM ORÛÇ