Bi ‘jin jiyan azadî’ bimeşin Amara

Ji bo 76’emîn Rojbûna Rêber APO li Xelfetiyê wê bi bernameyên cuda pîrozbahî pêk bê. Di çarçoveya bernameyan de wê Meclîsa Ciwanan a DEM Partiyê ji Amedê ber bi Amarayê ve meşekê pêk bîne. Seranserê rê wê bernameyên cuda jî pêk bên. Îsal bernameyên 4’ê Nîsanê wê li dora banga sedsalê ya Rêber APO bên gel hev. Jinên Rihayê diyar kirin ku ew ji bo 4’ê Nîsanê amade ne û banga tevlibûna bernameyan kirin.

4’ê Nîsanê bibe roja azadiyê 

Dayika Aştiyê Meyaser Korkmaz daxuyakirin ku 4’ê Nîsanê ne tenê rojbûneke, rojbûna mîlyonan e û got:“Em dixwazin aştî û azadî li Rojhilata Navîn pêk bê. Em dixwsazin ku gelê me rabe ser piyan û li pêş jî jin hebin. Em ê tax bi tax, kolan bi kolan bigerin û gel 4’ê Nîsanê de vexwînin. 4’ê Nîsanê roja rojbûna serokatiya me ye. Lê ji bo me bi hezaran wateyên wê hene. Em dixwazin aştiyê ava bikin. Hêviya me eve ev rojbûn bibe wesîleya aştiyê. Bila tecrîda li ser serokatiya me bê rakirin. Êdî bes e. Divê em derfetên li pêş xwe binirxînin. Em bang li hemû kesî dikin. Werin em 4’ê Nîsanê ligel hev bin.”

Banga sedsalê ya 27’ê Sibatê 

Hevberdevka Komîsyona Hiqûqê ya DEM Partiyê Seveda Çelîk Ozbîngol, banga 27’ê Sibatê hatiye kirin bibîr xist û got:’’Banga sedsalê ya 27’ê Sibatê ji bo me hemûyan hat kirin. Di vê esasê de berpirsyariyên me wek jin û civakê heye. Niha 4’ê Nîsanê li pêş me ye. Wateya manewî ya 4’ê Nisanê di avakirina paşeroja demokratîk de girîng e. 4’ê Nîsanê Rojbûna Birêz Abdullah Ocalan watedare û ji bo mezinkirina pêvajoyê girînge. Divê her kes xwedî li pêvajoyê derkeve. Bi taybet jî jin. Em bang li hemû jinan dikin ku banga sedsalê mezin bikin û li qadan bin.”

Roja nasname-hebûnê 

Hevseroka DBP’a Navendê Sîbel Sutpak jî got:“Rojbûn carekê ye lê em Kurd vê du caran dijîn. Ya yekemîn biyolojîk ya duyem jî ya nasnameyê ye. Yanî ji tunebûnê hebûne. Ev jî bi saya Rêberê Gelê Kurd Abdullah Ocalan çêbû. Em ê ji ber vê 4’ê Nîsanê de li Amarayê bin. Em ê darên zeytunan biçînin. 3’yê Nîsanê de jî wê festîval hebe. Wê 4’ê Nîsanê bi tevlibûna navenda giştî rojbûna Birêz Ocalan bê pîrozkirin. Madem gav hat avêtin divê tecrîd bê bidawîkirin. Daxwaza me ev e ku Birêz Ocalan 4’ê Nîsanê de li gundê xwe Amarayê be.” Endama Meclîsa Şaredariya Curnê Reş Hatîce Goktepe jî got:“Rêber Abdullah Ocalan diyariya herî xweş ya daye jinan ‘felsefeya jin jiyan azadî ye’.Bi wê felsefeyê têkoşîna jinên Kurd li cîhanê deng da. Em di xeta wê felsefeyê de têkoşîna xwe didomînin. Em xwedî li banga serokatiyê derkeve. Em hemû gelê xwe vexwendiyê Amarayê dikin.”

JINNEWS/RIHA