Berê gel li Amarayê bû

Bi dirûşma,’’Ji bo azadiyê ber bi Amarayê ve’’ gelê Kurd ji bo ku bûyina Rêberê xwe pîroz bike,berê xwe da gundê Amarayê. Di axaftinan de hate gotin, divê Ocalan azad bibe û girtîgeha Imralî were rakirin.

Rêber Abdullah Ocalan ku ev 25 sal in li Girtîgeha bi Ewlekariya B a Jidiyayî ya Imraliyê di tecrîdê de tê ragirtin, keta 75 saliya xwe. Ji bo 4’ê Nîsanê roja bûyina Rêber Abdullah Ocalan gel berê xwe da gundê Amara yê bi ser Xelfetî ya Rihayê ve. 

Gel bi dirûşma “Ji bo azadiyê ber bi Amarayê ve” berê xwe Amara. Kongreya Civaka Demokratîk (KCD), Tevgera Jinên Azad (TJA), Komeleya Piştgirî û Piştevaniya bi Malbatên Xizmên Xwe li Dergûşa Şaristaniyê Windakirina re (MEBYA-DER), Federasyona Hiqûqî û Piştevaniya bi Malbatên Girtî û Hikûmxwaran re ya MED’ê (MED TUHAD-FED), Partiya Herêmên Demokratîk (DBP) û Partiya Wekhevî û Demokrasiyê ya Gelan (DEM Partî) pêşengtiya meşê dikin.

Ev zêdetirî 3 sal in destûr nayê dayîn Rêber Abdullah Ocalan malbat û parêzerên xwe bibîne. Ji bo meşa ber bi Amarayê ve, gelek kes ji bajarên Kurdistanê û Tirkyê li Taxa Eligorê ya navçeya Pirsûsê hatin cem hev.

Parlamentera DEM Partiyê ya Mêrdînê Saliha Aydenîz beriya meşê li ser navê girseyê daxuyaniyê dide.

Em ê ji bo azadiya Ocalan bixebitin

Wekîlê Rihayê yê DEM Partiyê Omer Ocalan beriya ku meş dest pê bike ji çapemeniyê re axivî. Ocalan got,’’Em ji bo azadiya Rêzdar Ocalan, ji bo azadiya welatê xwe, ji bo azadiya Rojhilata Navîn, ji bo demokrasiya vî welatî dixebitin. ‘’

Ocalan berxwedana li zindanan a ji bo azadiya Rêber Ocalan bi bîr xist, diyar kir divê dengê berxwedana li zindanan were bihîstin. Ocalan her wiha got ew ê heta têkoşîna Rêber Ocalan têkoşîna xwe bidomînin û got,’’Ey Rêzdar Ocalan, ey Rêber Ocalan, bila bûyina te pîroz be.

Divê Imralî were girtin

Piştre Hevseroka DBP’ê Çigdem Kiliçgun Uçar axivî. Uçar di axaftina xwe de got ne bi polîtîkayên şer, ne bi polîtîkayên tecrîdê û ne jî bi Plana Çokşikandinê kesek nikare serî li Kurdan bitewîne. Uçar, bûyina Rêber Abdullah Ocalan pîroz kir û got, Divê Girtîgeha Imraliyê were girtin, ji bo pêvajoyeke çareseriyê pêk were ew ê têbikoşin û ji bo ku Rêber Abdullah Ocalan bikaribe rola xwe bi cih bîne divê şert bêne hazirkirin.

MA/RIHA