Wê hevdîtinên li Başûr bidomin

Aktivîsta TJAyê Adalet Fîdan ku di nava şandeya Başurê Kûrdistanê de cih digirt da zanîn ku serdanên wan ên Başûrê Kurdistanê dê bidomin û got:"Ji bo pirsgirêka Kurd bê çareserkirin divê hemû Kurd piştgiriya pêvajoyê bikin. Li ser vê yekê jî nirxandin hatin kirin.”

Şandeya ku ji Kongreya Civaka Demokratîk (KCD), Tevgera Jinên Azad (TJA), Partiya Herêmên Demokratîk (DBP) û Partiya Wekhevî û Demokrasiyê ya Gelan (DEM Partî) pêk dihat di 26ê Adarê de serdana Başûrê Kurdistanê kir û li wir bi sazî û dezgeyan re hevdîtin kirin. Şandeyê li bajarê Silemaniyê li ser banga “Aştî û Civaka Demokratîk” a Rêberê Gelê Kurd Abdullah Ocalan bi sazî, rêxistin, rewşenbîr, nivîskar û gelek kesan re hevdîtin kir. Şandeyê li ser pêvajoyê pirs bersivandin û pêşniyarên wan girtin. Aktivîsta TJAyê Adalet Fîdan û endama şandeyê tekildarî hevdîtinê axivî.

Adalet Fîdan diyar kir ku li ser daxwaza sazî û rêxistinên Başûrê Kurdistanê wan serdan kir.

Piştgî dan banga Ocalan

Adalet Fîdan anî ziman ku şandeya wan li Silemaniyê eleqayeke mezin dît û wiha axivî: “Eleqeyeke pir mezin hebû. Bi kêfxweşî em pêşvazî kirin. Li ser pêvajoyê pirs pirsîn û pêşniyarên xwe anîn ziman. Piştgirî dan banga birêz Abdullah Ocalan. Anîn ziman ku bang ne tenê ji bo Bakurê Kurdistanê ji bo tevahî Kurdistanê û Rojhilata Navîn e. Anîn ziman ku ev bang dê serkeftineke mezin û aştiyeke mayinde bîne û gotin ‘Pirsgirêka Kurd bi rêya demokrasiyê divê bê çareserkirin.”

Pirsgirêka Kurd yek e

Adalet Fîdan anî ziman ku hevdîtina wan a Başûrê Kurdistanê ji bo yekitiya Kurd jî encamên baş derxistinê holê û got: “Em 3 rojan li Başûrê Kurdistanê man. Hevdîtin pêk anîn. Bi 10'an sazî û dezgehan re me hevdîtin pêk anî. Pirsnîşanên li ser pêvajoyê jî zelal bûn. Şandeyê yek bi yek pirsên wan bersivandin. Sazî û derdorên me bi wan re hevdîtin kir. Ji bo pêvajo biçe serî piştgiriya xwe anîn ziman. Her wiha pêşniyar kirin. Wê hevdîtinê ji bo yekitiya gelê Kurd û jinên Kurd jî encamên baş derxist holê. Sazî û derdoran jî destnîşan kir ku pirsgirêka Kurd yek e û divê yek bê destgirtin. Ji bo pirsgirêka Kurd bê çareserkirin divê hemû Kurd piştgiriya pêvajoyê bikin. Li ser vê yekê jî nirxandin hatin kirin.”

Wê hevdîtin bidomin

Di dawiya axaftina xwe de Adalet Fîdan da zanîn ku serdanên wan ên Başûrê Kurdistanê dê bidomin û wiha qedand: “Hevdîtinên me li Başurê Kurdistanê wê berdewam bikin. Me li Silemaniyê hevdîtin kirin Lê plan heye ku li Hewlêr, Duhok û bajarên din jî hevdîtin bên kirin. Ji bo wê jî serdana şandeyên me li Başurê Kurdistanê wê bidome û civîn û hevdîtin dê pêk bên. Yekitiya gelê Kurd û jinên Kurd ji bo me her tim pir girîng e. Ji bo yekitiya gelê Kurd jî xebatên cuda hene. Divê dewlet jî gavên şênber bavêje û azadiya fizîkî ya birêz Abdullah Ocalan pêk bê. Divê jin, civan, gelê Kurd û kesên demokrat têkoşîna xwe xurtir bikin.”

AW/ŞIRNEX