Tecrîd li gelek deveran hate şermezarkirin

Tecrîda li ser Rêber Abdullah Ocalan li gelek bajarên Ewropayê hate şermezarkirin. Di çalakiyan de bang hate kirin ku CPT demildest serdana Imraliyê bike, êrîşên dagirker û zextên li ser çand û zimanê Kurdî hate bibîrxisin û hate gotin ev giş bi tecrîdê ve girêdayî ne.

Stockholm

Çalakvanên ku li pêşiya parlementoyê stand vekirin, ji bo balê bibin ser rewşa Rêber Abdullah Ocalan bi sedan danezan û borşurên ku biyografiya wî tê de hebûn belavkirin.

Çalakvanên ku ji bo lêkolînkirina tecrîda girankirî ya li ser Rêber Ocalan, daxwaza avakirina komîteya ad-hoc a di bin sîwana AKPM’ê de kirin û bang li Komîteya Hiqûqê ya Konseya Ewropayê kirin.

Çalakvanan ev peyam dan, “Divê destûr bê dayîn ku Rêberê Gelê Kurd Abdullah Ocalan bi parêzer û malbata xwe re hevdîtinê bike û di bin şert û mercên ku bikaribe li Tirkiyeyê ji bo çareseriyeke siyasî ya demokratîk rol bilîze de were berdan.”

Bern

Li paytexta Swîsre Bernê jî tecrîda li ser Rêber Abdullah Ocalan, êrîşên dagirkerî û êrîşên li ser çanda Kurd bi çalakiyek hate şermezarkirin. Kurdistaniyên ku li ber Parlementa Federal a Swîsreyê hatin ba hev, daxuyanî dan. Piştî daxuyaniya li vir rayedarên hikûmeta Federal a Swîsreyê dosyeyên ku ji bo radestî hemû partiyên siyasî û parlamenteran bên kirin bi rêya e-maîlê şandin.

Ferhat Encû, destnîşan kir ku sîstema êşkenceyê ya tecrîdê ku bi temamî binpêkirina hiqûqa navneteweyî û mafê mirovan e, di esasê xwe de armanca wê bêdengkirina dengê gelê Kurd e û wiha got, "Êrîşên li ser Başûrê Kurdistanê, girtinên ji ber ziman, çand û nasnameya Kurd, bi tecrîdê ve yekser girêdayî ne.”

Piştî axaftinan dosyayên ku ji bo hikûmeta Federal a Swîsreyê, hemû partiyên siyasî û parlamenteran re hatibû amadekirin, bi rêya e-maîlê hatin şandin. 

Graz

Meclîsa Civaka Kurd a Demokratîk a bajarê Grazê ya Awusturyayê tecrîda li ser Rêber Ocalan şermezar kir. Çalakgeran  pankarta bi nivîsa “Ji Ocalan re azadî, ji Kurdistanê re aştî” nivîsî hildan, xemsariya CPT’yê û Konseya Ewropayê şermezar kir. 

Çalakvanan belavok belav kirin û diyar kirin ku mafê herî bingehîn ê mirovî yê Abdullah Ocalan divê nebe mijarê bazariyê û hat gotin ku gelê Kurd dê vê siyasetê qebûl neke. Meclîsa Gelê Kurd a Qibrisê li ber şaredariya bajarê Lîmasolê ji bo balê bikişîne ser tecrîda girankirî çalakiya rûniştinê ya 3 rojan da destpêkirin.

Qibris

Çalakgerên ku li ber Şaredariya Lîmasolê çalakî dan destpêkirin, bênavber dirûşmeyên “Bijî Serok Apo”, “Ji Ocalan re azadî” û “Bê Serok Jiyan Nabe” bi zimanê Kurdî, Îngîlîzî û Yewnanî berzkirin.

Li qada çalakiyê bi sedan belavok bi mijara tecrîda girankirî ya li Îmraliyê, hatin belavkirin.

Hevseroka Meclîsa Gelê Kurd a Qibrisê Fatma Dogan di çalakiyê de axivî. Dogan got, “Azadiya Rêber Ocalan sedema hebûna me ye. Divê tu kes li ser azadî û hebûna me bazariyê neke."

ANF