Şehîdên me rûmeta me ne

ARAT ARARAT / STEINHAGEN

Li bajarê Steinhagen a Elmaniyayê di şexsê Mam Zekî Şengalî de hemû şehîdên Şengalê hatin bibîranîn. Merasîmê bibîranînê bi Qewlên Şêx Hisên, bi ketina komeke dayîkên şehîdan a salonê destpêkir. Nûnerên saziyên Ewrûpayê yên Êzidiyan, Saziya Malbatên Şehîdan KOMAW û gelek welatî tevlî merasîmê bûn.

Em şopdarê doza xwe ne

Hevjîna Mam Zekî Dayîka Gulê Ozden, di axaftina xwe de got:’’Em ê hertim şopdarê doza şehîdên xwe bin. Şehîd bi tenê yên malbatan nînin, şehîdên tevahî Kurdistanê ne. Ez xelkê me yê Şengalê silav dikim û dibêjim divê em êdî yek bin.’’

Tên qetilkirin lê li berxwe didin

Şêx Hisên jî axaftinek kir û bal kişand ser zilam ku xelkê Êzidî di tevahiya dîrokê de jiyan kiriye û got:’’Ev 5 hezar sal in em li ser xaka xwe rûbirûyê fermanan dibin. Em tên qetil kirin, lê li berxwe jî didin. Bi Derwêşê Evdiyan, Mam Zekiyan, Mam Beşîran û Nûreddîn Sofiyan.’’

Em ê statuya xwe bidest bixin

Xanê Agal jî li ser navê organîzasyonê axivî û got:’’Şehîdan ji bo armanceke mezin û wêrekiyeke mezin, ji bo gelê xwe li xaka pîroz azad bikin, canê xwe feda kirin. Ew dever hemû kirin ziyaretgeh. Em bi wan serbilind in. Pêvajoya ku ji aliyê Rêber APO hatiye destpêkirin, ronesansek e. Em weke Êzidî jî di nava vê pêvajoyê de ne. Heta ku em statuya xwe bidest bixin, em ê têkoşînê bidomînin.’’

Şehîd temsîla edaletê ne

Li ser navê KOMAW’û Alî Konkurt mafê axaftinê wergirt û got:’’Tiştên herî pîroz canê xwe feda kirin. Ew li her qada jiyan bi me re ne. Rêbertî ji bo şehîdan dibêje:’’Şehîd fermandarên min in.’’ Şehîd îdeolojiya me ne. Nûnerên hiqûq, wicdan, ehlaq û edaletê ne. Em ê teqez bigîhên azadiyê ku daxwaza wan bû. Em bi vê bawerin.’’ Di bibîranînê de sînevîzyona li ser jiyan û têkoşîna şehîdan hatibû amadekarin hate guhdarkirin. Di vê demê de kêliyên hestiyar hatin jiyîn. Di salona merasîmê de dirûşmeyên ‘Bijî Serok APO’, ‘Şehîd Namirin’ olan da. Rêveberiya Xweser a Şengalê, Yekîtiya Êzidiyan a Sûrî û Hevserokê Berê yê Şaredariya Elihê ya HDP’ê Sabrî Ozdemîr jî ji bo bibîranînê peyam şandin.