Rojeke jinan mîna Newrozê

Sêşem 9 Adar 2021 - 01:59

  • Ji Amed û Wanê heta bi Dêrik, Heleb û Dêrazorê, dîsa ji Şengalê heta bi Silêmaniyê û ji wir li gelek navendên Ewrûpayê bi coş û xuroş hat pîrozkirin.

8ʼê Adarê Roja Jinan a Cîhanê îsal mîna Newrozê pêk hat. Pîrozbahiyên çend roj berê dest pê kirin di 8ʼê Adarê de mîna Newrozekê pêk hatin. Ji Amed û Wanê heta bi Dêrik, Heleb û Dêrazorê, dîsa ji Şengalê heta bi Silêmaniyê û ji wir li gelek navendên Ewrûpayê bi coş û xuroş hat pîrozkirin.

Amed

Ji Amedê heta Wanê

Mîtînga 8’ê Adarê ya Amedê bi dirûşma “Em li dijî qirkirina jinê jiyanê, li dijî tecrîdê azadiyê diparêzin” dest pê kir. Jinan bi cil û bergên xwe yên rengîn qad xemilandin.

Bi pêşengiya Platforma Jinan a Dîcle Amedê (DAKP) û Meclîsa Jinan a Partiya Demokratîk a Gelan (HDP) li Amedê bi dirûşma "Em li dijî qirkirina jinê jiyanê, li dijî tecrîdê azadiyê diparêzin" li Qada Îstasyonê ya Amedê mîtîng pêk hat.  Di qada mîtîngê de pankartên wekî “Em li her derê ne, dê serdestiya mêr têk bibin", "Bijî 8'ê Adarê", "Ji bo azadiya jinan, destpêkê edalet" vekirin.