Qeyran bandorê li jinan dike

Jinên li Sûka Mezin a Gel a Wanê dixebitin diyar kirin ku ji ber krîza aborî lêçûna zêde bûye karê wan zehmet kiriye. Jinan gotin ew li dij qeyrana aboriyê li berxwe didin. 

Krîza aborî roj bi roj kûrtir dibe û herî zêde jin ji vê krîzê bi bandor dibin. Ev pêvajoya dijwar ku her aliyê jiyanê hejandiye, jiyana jinên esnaf kiriye qada têkoşînê. Lîreyê Tirk ku her roj nirxê xwe winda dike, bi zêdebûna lêçûnên berheman re, esnafan neçar dike ku bihayan zêde bikin. Lê ev zêdebûn dibe sedema kêmbûna firotan û windakirina mişteriyan, esnafan dixe rewşeke hîn dijwartir. Jinên li Sûka Mezin a Gel a Wanê dixebitin, ne tenê bi krîza aborî, bi zextên civakî û şert û mercên neyînî yên xebatê re jî têdikoşin. Digel ku piraniya wan di binê mûçeya herî kêm de jî dixebitin, sarbûna dergehê ku lê dixebitin jiyana wan hîn dijwartir dike.

Biha hefte zêde dibin

Rojîn Ocek, da zanîn ku kargeha ku lê dixebitî aîdî malbata wê ye û diyar kir ku ew di dibistana amadeyî de dixebite. Rojîn Ocek wiha got: “Ez ji dibistana navîn û vir ve car caran têm û dixebitim. Ev sê salên dawîn ez bi berdewamî li vir im. Weke jin li vir karkirin bi rastî zehmet e. Karê me hîn dijwartir dibe, nemaze ji ber ku cihê karê min li ser kincên binî ye. Potansiyela karsaziya me li gorî salên berê pir xirab e. Divê êdî biha zêde nebin. Her kes zehmetiyê dikişîne."

 Aborî xirab e

 Zehra Polat a ku 6 sal in li Sûka Gel a Mezin di dikana çayxaneyekê de dixebite, diyar kir ku bi taybetî bi kiryarên mêr re gelek caran pirsgirêkên wê çêdibên. Zehra Polat, anî ziman ku yek ji zehmetiyên herî zêde yên xebata li Sûka Mezin sermaya zivistanê ye û wiha got: “Em nikarin debara xwe bikin. Hema hema her kesê ku li Wanê dixebitin di binê mûçeya herî kêm de dixebitin. Di van demên dawî de min bi kiryarekî xwe re li ser bihayan nîqaş kir. Bi vî awayî, em nikarin malên xwe bifroşin. Aborî bi rastî xirab e. Kes tiştekî nagire. Ez di vê mijarê de ji kiryaran fêm dikim, lê em wekî esnaf di navberê de ne.  Kiryar ji zêdebûna bihayên me gelek gazinan dikin."

 Ji ber aboriyê zehmetiyê dibîne

 Herî dawî Dîdem Çetîner a ku 5 meh in li Sûka Mezin a Xişiran dixebitî, diyar kir ku ji ber ku piraniya esnaf mêr in, zehmetî kişandiye. Dîdem Çetîner, anî ziman ku ew di bin mûçeya herî kêm de dixebite û ji ber vê yekê di warê aboriyê de zehmetiyê dikişîne.

JINNEWS/WAN