Qatilên baş ‘pak’ kirin

• Li Şemzînanê efserên Tirk Alî Kaya û Ozcan Îldenîz û îtîrafkar Veysel Ateş ên ku bi bombeyan êrişî Pirtûkxaneya Ûmûtê kiribûn, beraat kirin.

Li Şemzînanê efserên Tirk Alî Kaya û Ozcan Îldenîz û îtîrafkar Veysel Ateş ên ku bi bombeyan êrişî Pirtûkxaneya Ûmûtê kiribûn, beraat kirin.

Efserên Tirk Alî Kaya û Ozcan Îldenîz û îtîrafkar Veysel Ateş, piştî êrişa bombeyî ya li dijî Pirtûkxaneya Ûmût a li navçeya Colemêrgê Şemzînanê li ser sûc hatibûn girtin, ji doza jê dihatin dadgehkirin, beraat kirin. Rûniştina dozê li Dadgeha Cezayê Giran a Wanê ya 1’ê hate kirin. Tohmetbar tevlî rûniştinê nebûn.

Xwediyê pirtûkxaneya Ûmûtê, Seferî Yilmaz û gelek parêzer tevlî rûniştina dozê ya li Dadgeha Cezayê Giran a 1´ê ya Wanê bûn.

Biryareke alîgir û ne serbixwe

Seferî Yilmaz diyar kir ku ev beraeteke alîgîr e û got, “Ji ber bombeyê hê jî di guhê min de nexweşî heye. Piştî teqînê min bera dû Veysel Ateş da û kete wesayîta 60 metre dûr. Me ev kes li ser sûc zeft kir. Alî Kaya bagaja wesayîtê vekir û xwest bi kalaşnîkofê gule li gel bireşîne, lê gel ew asteng kir. Ev êrişkar li ser sûc hatin zeftkirin û sûcdar teslîmî dewletê hatin kirin. Ligel ku her tişt li ber çavan e, ev beraeta êrişkaran, maneya wê, ev biryareke alîgir e.”

Heyeta dadgehê biryara beraeta efserên Tirk Alî Kaya û Ozcan Îldenîz û îtîrafkar Veysel Ateş da.

Fermandarê Hêzên Bejahî yê wê demê Yaşar Buyukanit ji bo leşkerên Tirk Alî Kaya û Ozcan Îldenîz, gotibû “Ez wan nas dikim, kurên baş in.” 

9´ê Mijdara 2005´an îtîrafkar Veysel Ateş bombe avêtibû Kitîbfiroşiya Umiut a li Şemzînanê. Di êrişê de kesek hatibû qetilkirin. Piştî ku xelkê navçeyê êrişkar Veysel Ateş, Alî Kaya û Ozcan Îldenîz li ser sûc zeft kirin, leşkerekî din gule li xelkê reşandibûn û welatiyekî din şehîd kiribûn.

WAN