Netîceyê Xelatê Rojnamegerî yê Mûsa Anterî eşkera bîyê

Xelatî emser reya 29ine ameyê dayene.

Mûsa Anter 20ê Êlule 1992yî de Dîyarbekir de hetê JÎTEMî ra ame qetilkerdiş. Xelatê Rojnamegerî yê Mûsa Anterî, qetilbîyayîşê ey ra dima yenê dayene. Xelatî emser reya 29ine ameyê dayene. Musabeqa hetê rojnameyê Yeni Yaşamî ra yena viraştene. Xelatî beşanê sey, Xebera Tirkî, Xebera Kurdkî, Fotograf, Karîkatur û bi nameye Gurbetellî Ersoz Xeberkarîya Cinîyan de ameyê dayene.

 Xelatî do 23ê Êlule de Îstanbûl Şîşlî de Merkezê Kulturî yê Cemîl Candaşî de bi merasîmêk bidîyê wayîranê ci.

Xebera Tirkî

Jûrîyê na beşe de Can Yildiz, Faruk Eren, Fatih Polat, Îbrahîm Varli û Huseyîn Aykolî estibî. Xelata Xebera Tirkî bi xebera ‘Beylikdüzü’nde 2 yaşındaki çocuğa istismar iddiası’ Bîanet ra dîyaye Evrîm Kepeneke.

Fotograf

Jûrîya beşa fotografî de Ramazan Ozturk, Ozcan Yaman, Nezahat Dogan, Refîk Tekîn û Çetîn Altunî estibî. Fotografê cinazaya Hakan Arslanî ke tereyêk de dîyabî pîyê ci Alî Riza Arslanî xelate girewte. No fotograf Ajansê Mezopotamyayî ra hetê Eylem Dage ra amebi antene. 

Xebera Kurdkî

Jûrîya na beşe de Leyla Ayaz, Kadrî Esen, Suna Tunç, Berîtan Zagros û Ramazan Olçenî estibî. Xebera Omer Faruk Baranî ya bi nameyê ‘Manaya bilibendê û çend sirên ‘Kurdish Mashup 2019’î xelate girewte.

Xelata Xeberkarîya Cinîyan

Jûrîya na beşe de Ceren Sozerî, Bîrcan Degirmencî, Pinar Ural û Habîbe Eren estibî. Xelata Xeberkarîya Cinîyan a Gurbetellî Ersoze dîyaye xebera Mudira Karanê Nuşteyî ya JINNEWSî Sayîye Alagaşe. Xebera bi nameyê ‘Polis tecavüz etti, savcı, doktor ve polis üstünü örtmek istedi’yî xelata yewînîye girewt. Safîye Alagaşe tewrê 16 rojnamegeran Dîyarbekir de ameye girewtene û nika hepis de ya.

Karîkatur

Jûrîya na beşe de Îmam Cîcî, Sefer Selvî û Asli Alper estibî. Xelata yewînîye mabênê 2 kesan de ameye parekerdiş. Xelate dîyaye karîkaturê bi nameyê ‘Atlaslı’yî yê Ozgur Evranî û bi nameyê ‘Gül açmış ceset’î yê Murat Îpekî. 

Xelata Rûmetî

Xelatan mîyan de Xelata Rûmetî zî estibî. Xelata Rûmetî dîyaye dayîkanê Nobeta Edaletî. Nobeta Edaletî seba ke hepsîyê nêweşî bêrê vedadayîş û tecrîdî bêrê wedartiş yena ramitene.

MERKEZÊ XEBERAN