10’emîn Mîhrîcana Çand û Hunera Zarokan ku ji aliyê Tevgera Hîlala Zêrîn a Çanda Jinan ve, bi tevkariya Tevgera Mezopotamiya ya Çand û Hunera Demokratîk (TEV-ÇAND) tê birêxistinkirin, wê 1’ê Îlonê hemwextî Roja Aştiyê ya Cîhanê dest pê bike.
Ji pêkhateyên cuda yên Bakur û Rojhilatê Sûriyeyê dê nêzî hezar û 500 zarok ên ku cihê xwe di nava 83 komên çandî û hunerî de digirin beşdarî mîhrîcanê bibin. Ji Qamişloyê 35 kom, ji Hesekê 20 kom, ji Reqayê 10, ji Kobanê 9 kom û ji Helebê jî 9 kom beşdar mîhrîcanê bibin.
Li gorî bernameya mîhrîcanê dê şano, stran û govendên foklorî werin pêşkêşkirin û pêşangehên wêneyan werin vekirin. Bi armanca pêşxistina behreyên zarokan jî dê çalakî werin lidarxistin. Her wiha dê axaftinên destpêkê hebin û li hemû bajaran daxuyanî werin dayîn.
Mîhrîcan wê 1’ê Îlonê li Rimêlan û Helebê dest pê bike, 2 Îlonê wê li Kobanê û Reqayê dewam bike û 7’ê Îlonê jî wê li bajarê Hesekê bi dawî bibe.
Ji zarokan re hawirdoreke bi ewle
Mîhrîcan li Qamişlo û Helebê dê mîhrîcan bi dirûşma "Ji destê min bo destê zarok min kilîtên azadiyê radestî wan kir û deriyên asîman ji wan re vekir" were lidarxistin. Li Reqayê jî wê bi dirûşma " Zarokên me firinndeyên mîhrîcanê ne", li Hesekê jî wê bi dirûşma "Hunera zarokan sembola azadî û afrîneriyê ye" bi rêve biçin. Mîhrîcana li Kobanê jî wê bi dirûşma "Em ji dixwazin bi Rêber Apo re hevdîtinê bikin" were organîzekirin.
Ji rêveberên Tevgera Hîlala Zêrîn a Herêma Bakur û Rojhilatê Sûriyeyê Mizgîn Çolaq der barê mîhrîcanê de agahî dan ajansa me.
Mizgîn diyar kir ku armanca mîhrîcanê ew e ku behreyên zarokan pêş bixin, hawirdoreke ewle ji wan re peyda bikin da ku tiştên di xeylanên xwe de îfade bikin, her wiha nirxên aştî, tevkarî û jiyana hevbeş di navbera pêkhateyan de belav bikin.
Mizgîn diyar kir ku mîhrîcan nameyek mirovî ji bo cîhanê ye ku zarokên Bakur û Rojhilatê Sûriyeyê tevî zehmetî û pirsgirêkan dikarin hêviyê biafirînin û got, ew mîhrîcanê diyarî Rêber Abdullah Ocalan dikin.
ANHA/QAMIŞLO
parvê bike
Nûçeyên ku dikare bala we bikşîne
