Metirsiya bidarvekirinê heye

Kampanyaya ‘Sêşema Na ji bo Cezayê Darvekirinê’ ragihand ku dosya Werîşe Muradî li Dadgeha Bilind a Îranê ye û metirsiya darvekirina wê heye. Kampanyê daxwaz kir ku demildest cezayê darvekirinê yê Werîşe Muradî bê betalkirin. Her wiha bang li tevayî azadîxwaz û malbatên girtiyan hat kirin ku li dijî cezayên darvekirinê xwepêşandan û nerazîbûn nîşandin.

Kampanyaya ‘Sêşema Na ji bo Cezayê Darvekirinê’ di pêngava xwe ya 62’yemîn de ku ji girtiyên 38 girtîgehên Rojhilatê Kurdistan û Îranê pêk tê, derbarê cezayên bidarvekirinê de daxuyaniyek belav kir. Di daxuyaniyê de hat gotin ku rejîma Îranê di dema Newrozê û meha Remezanê de jî dayîna cezayên bidarvekirinên nemirovane berdewam kir. Di dewamê de hat gotin ku gelek girtî bi mebesta bêdengkirinê cezayên darvekirinê li wan hatine birîn û wiha dewam kir:“Piştî bi dawî hatina betlaneyan metirsiya bidarvekirinê li ser welatiyên ku cezayê bidarvekirinê li serin, bi taybetî jî Werîşe Muradî ku dosya wê li Dadgeha Bilind a Îranê ye heye. Em daxwaza tavilê betalkirina cezayê bidarvekirinê yê Werîşe Muradî dikin ku ev kuştineke bi zanebûn a dewletê ye.” Di heman daxuyaniyê de bang li tevayî azadîxwaz û kesûkarên girtiyan hatiye kirin ku li ber girtîgehan û li her cihî li dijî cezayên darvekirinê xwepêşandan bikin û daxwaza betalkirina cezayên darvekirinê bikin. Hêjayî gotinê ye Kampanyaya ‘Sêşema Na ji bo Cezayê Darvekirinê’ di 9’ê Çileya 2023’yan de dijî bidarvekirinên li Rojhilatê Kurdistan û Îranê hatiye avakirin.

NAVENDA NÛÇEYAN