Li ber hevrêyan xwe feda kir

• HPG-NRÇ'ê Cûdî Zagros bi bîr anî û got:"Hevrêyê me Cûdî ku xwedî ruhê fedaî yê Apoyî bû, ji bo parastina hevrêyên xwe, xwe feda kir û şehîd bû."

Navenda Ragihandin û Çapemeniyê ya Hêzên Parastina Gel (HPG-NRÇ) li ser şehadeta gerîla daxuyaniyek da. Daxuyanî bi vî rengî ye:"Ewladê leheng ê gelê me yê Rojhilatê Kurdistanê û milîtanê pêşeng ê ciwantiya Apoyî hevrêyê me Cûdî Zagros di 18'ê Hezîrana 2021'ê de li Herêmên Parastinê yên Medyayê şehîd bû. Hevrêyê me Cûdî ku gelek derfetên sîstema kapîtalîst red kir û li nava refên Têkoşîna Azadiyê ya Kurdistanê têkoşîneke bênavber meşand, bû milîtanek ku felsefeya Apoyî bixe meriyetê. Welatparêzekî rasteqîn bû ku ji gel û welatê xwe hez dikir. Bi têgihiştina ku hêjayî şehîdan be nêzî her karî bû û hewl da berpirsyariyên xwe yên dîrokî bi cih bîne. Bi tevlîbûna xwe ya bi coş, bi dînamîzma xwe ya ciwantiyê û sekna xwe ya dilnizm a li nava jiyanê ciwantiya Apoyî bi rengekî hêja temsîl kir. Bi eşq tevlî her wezîfeya li her qadê bû û di nava têkoşîna me de bi rola xwe rabû. Bi kûrbûna xwe ya li ser bingeha Gerîlatiya Modernîteya Demokratîk û israra xwe ya li ser taktîkên demê,  hewl da têkoşîna azadiyê ya gelê me bi ser bixîne. Hevrêyê me ku kedakekî mezin bû û di fedakariyê de sînor nasnedikir, bi rengekî welê tevlî bû ku cihê wî nayê dagirtin. Hevrêyê me Cûdî ku xwedî ruhê fedaî yê Apoyî bû, ji bo hevrêyên xwe biparêze, ji bo zerar negihêje wan, xwe feda kir û şehîd bû. Em soz didin ku em ê tevlîbûna bê fikar û fedaîtiya hevrêyê xwe Cûdî ji xwe re bikin mînak û xewn û xeyalên şehîdên xwe bi ser bixînin. Li ser vê bingehê di serî de malbata hêja ya hevrêyê me Cûdî em sersaxiyê ji gelê Rojhilatê Kurdistanê û tevahiya Kurdistanê yê welatparêz re dixwazin.

Bi îradeyeke bêsînor têkoşiya

Hevrêyê me Cûdî li gundê Belavê yê Ûrmiyeyê li nava malbateke me ya hêja jidayîk bû. Hevrêyê me ku li Beşa Zanistên Rêveberî û Aboriyê ya Zanîngeha Ûrmiyeyê dest bi perwerdeya xwe kir, lêgerînên xwe kûr kir û di vê demê de li ser Parêznameyên Rêbertî xwe kûr kir. Hevrêyê me xwest bersiva herî xurt bide banga seferberiyê ya Rêber Apo û bêteredût di sala 2015'an de tevlî nava refên gerîla bû.

Hevrêyê me Cûdî bi jîr û jêhatîbûna xwe li her qadê bal dikişand ser xwe, bi kesayetiya xwe ya samîmî û durust di demeke kurt de têkiliyeke xurt bi hevrêyên xwe re danî. Hevrêyê me li ser Parêznameyên Rêbertî û dîroka berxwedanê ya PKK'ê ya bûye efsane şareza bû û tevkariyeke mezin li perwerdekirina hevrêyên ciwan kir ku tevlî nava refên têkoşînê bûn. Hevrêyê me ku ji bilî zimanê xwe yê dayikê Kurdî gelekî baş bi Farsî, Tirkî û Azerî zanî bû, di her mijarê de zû dibû pispor û bi vî rengî beşdarî têkoşînê bû. Hevrêyê me Cûdî PKK bi vê gotinê pênase dikir, 'PKK şêweyeke jiyanê ye ku di nav de heqîqet, durustî, hevrêtî û samîmiyet heye'. Ji bo ev pîvanên bingehîn ên jiyana PKK'ê bigihîne gelê me bi îradeyeke bêsînor û daxwazeke bê dawî têkoşiya. Felsefeya Apoyî li her qada jiyanê temsîl kir, li cihê ku lê ma bû hevrêyekî me yê mînak."

Agahiyên li ser nasnameya hevrêyê me Cûdî Zagros bi vî rengî ne:

Cûdî Zagros (Kawa Herekolî), li Urmiyê jidayîk bûye, 18’ê Hezîrana 2021’an li Herêmên Parastinê yên Medyayê şehîd bû.

BEHDÎNAN