Li 13 navendan şahî mitîng û meş

Piştî "Banga Aştî û Civaka Demokratîk" a Rêber APO, Platforma Saziyên Demokratîk di çarçoveya "Civînên Civaka Demokratîk" de gelek çalakî li dar xistin. Heta niha li Tirkiye û Kurdistanê zêdetirî 2 hezar civînên bi vî rengî hatine lidarxistin û di çarçoveya çalakiyên berdewam de, Platforma Saziyên Demokratîk dê li 13 bajaran mihrîcan, mitîng û meşan li dar bixe. Narîn Gezgor, Cîgira Hevseroka DBP’ê, ku pêkhateyeke Platforma Saziyên Demokratîk e, der barê çalakiyên heyî û yên gengaz de agahî parve kirin. Narîn Gezgorê destnîşan kir ku wan li Kurdistan û Tirkiyeyê zêdetirî 2 hezar civîn li dar xistine û ev civîn berdewam dikin. Narîn Gezgorê destnîşan kir ku jinên ku pêşengiya pêvajoyê dikin eleqeyek û beşdarbûneke xurt nîşanî civînan dane.

Kargehên îdeolojiya rizgariya jinê 

Narîn Gezgorê destnîşan kir ku piştî banga Rêber APO, Meclîsa Jinan a DBP'ê li gelek bajaran civînên jinan bi balkişandina ser îdeolojiya rizgariya jinan li dar xistiye û got:"Me atolyeyên jinan li dar xistin. Me li 15 bajaran 50 atolye li dar xistin. Em bi hezaran jinan re di van atolyeyan de hatin cem hev. Me van atolyeyan bi hişmendiya ku jin hêza bingehîn a avakirina aştiyê ne û rizgariya civakê bi rêgeza azadiya jinan dikare pêk were, li dar xistin. Me van hewldanan bi hişmendiya ku belavkirina îdeolojiya rizgariya jinê û civakîkirina perspektîfa birêz Ocalan, di rastiyê de, yek ji hîmên civakeke demokratîk e, dest pê kir û xebata me berdewam dike." Narîn Gezgorê diyar kir ku ew ê xebatên xwe yên di vî warî de bidomînin. 

Gel şahî û mîtîng xwestin 

Narîn Gezgorê destnîşan kir ki avakirina civakeke demokratîk hemû beşên civakê, tevî hêza siyasî, femînîst û sosyalîstan, digire nav xwe û got:"Lê girîng e ku hemû dînamîkên civakê xwe wekî avaker bibînin. Ji ber vê yekê, wekî Platforma Saziyên Demokratîk, me civîn plan kirin da ku bangewaziyê û avakirina civakeke demokratîk bi vê hişmendiyê eşkere bikin. Vê bangewaziyê bi xwe coşeke mezin çêkir. Di civînan de, mirovan bi daxwazên meş û pîrozbahiyan ji bo silavkirina vê bangewaziyê û îradeya civakeke demokratîk serî li me dan. Ji bo vê armancê, me biryar da ku li 17 navendan meş û pîrozbahiyên girseyî li dar bixin. Me kampanyaya xwe li Cîzîrê da destpêkirin. Em ê çalakiyên xwe li gelek bajaran, di nav de Semsûr, Agirî, Bedlîs û Çewlîg, li dar bixin. Di vê çarçoveyê de, em hemû beşên civakê, di nav de jin û ciwan, vedixwînin ku beşdarî meş û şahiyên me bibin ku em ê li hemû bajarên Kurdistan û Tirkiyeyê li dar bixin û pêvajoya nû û civaka demokratîk a ku em hewl didin bi awayê herî xurt ava bikin, silav bikin." Narîn Gezgorê diyar kir ku mihrîcan û meşên ku li Cizîr, Dep û Tetwanê li dar xistine wê di 6'ê Tebaxê de li Bazîdê berdewam bikin; 9’ê Tebaxê li Semsûr, Çewlîg, Wêranşar û Sêrtê; 10’ê Tebaxê li Qoser, Edene; 11’ê Tebaxê li Mûşê; 12’ê Tebaxê li Gever, Îdîr; 13’ê Tebaxê li Êlih, Mêrsîn; û di 14'ê Tebaxê de li Amedê. Narîn Gezgorê ev agahî parve kir ku dê di 23'yê Tebaxê de li Wanê mitîngê pêk bînin.

MA/MUJDAT CAN