Komxebata Ronesansa Jinên Êzidî

TAJÊ dê 28’ê Tebaxê bi dirûşma ‘Bi rêxistin û têkoşînê em ê bibin pêşenga civaka demokratîk û azad’ Komxebata Ronesansa Jinên Êzidî pêk bîne. Rîham Hesen bang li jinan kir ku bibin pêşenga ronesansê.

Dê di 28’ê Tebaxê de Tevgera Azadiya Jinên Êzidî (TAJÊ) bi dirûşma ‘Bi rêxistin û têkoşînê em ê bibin pêşengên civaka demokratîk û azad’ komxebata Ronesansa Jinên Êzidî li dar bixe. Di komxebatê de li ser mijarên wekî jineolojî, piştî fermanê rola jinan, xweparastin û pêşengtiya jinan a ji bo pêvajoya nû, dê semîner bên lidarxistin.

Têkildarî armanca lidarxistina komxebatê Hevseroka Desteya Rêveberiya Xweser a Şengalê û Endama Koordînasyona TAJÊ Rîham Hesen  axivî.

Rîham Hesen di destpêka axaftina xwe de bal kişand ser têkoşîn û destkeftiyên TAJÊ. Rîham diyar kir ku TAJÊ heta roja îro bi têkoşîna xwe tê nasîn û bi fikirên Rêberê Gelê Kurd Abdullah Ocalan xwe birêxistin kiriye, xwedî destkeftiyên mezin e.

Rîham Hesen destnîşan kir ku 11 sal piştî fermanê, dê Komxebata Ronesansa Jinên Êzidî bi dirûşma ‘Bi rêxistin û têkoşînê em ê bibin pêşengên civaka demokratîk û azad’ bi tevlibûna bi dehan delegeyan bê lidarxistin û ev nirxandin kir: “Piştî banga Rêber Apo ya divê civaka Êzidî û jinên Êzidî ronesansa xwe pêk bînin, em ê komxebata ronesansa jinên Êzidî lidar bixin. Di 11 salan de wek jin û civak me bi têkoşîn û berxwedana xwe êrîş û lîstokên dijmin têk birin û gelek destkeftiyên girîng bi dest xistin. Bi komxebatê re dê bi pêşengtiya jin û civaka êzidî ber bi azadiyê ve bimeşe. Jin dikarin di pêkanîna ronesansê de rola xwe ya pêşengtiyê bilîzin û dê bibin pêşengên esasî ya ronesansê.”

Di dewama axaftina xwe de Rîham Hesen bal kişand ser mijarên ku dê di komxebatê de bên nirxandin û ev tişt anîn ziman: “Di komxebatê de xalên herî esasî ferman û piştî fermanê rola jinan, dê bên destgirtin. Derbarê ronesansê de rola jinan dê çi be, li ser wê semîner dê bê dayîn. Em bi hêvî ne dê ev komxebat ji pêşengiya jinên Êzidî ya ji bo ronesansê re bibe bingeheke xurt.”

Rîham Hesen di dawiya axaftina xwe de ev bang li hemû jinan kir: “Bang li hemû jinan bi taybetî jinên Êzidî dikim ku xwedî li ronesansê derkevin û bibin pêşenga ronesansê.”

NÛJINHA/ŞENGAL/HÊVÎDAR ŞENGALÎ