KNK çû serdana Hewlêrê

• Şandeya Kongreya Neteweyî ya Kurdistanê (KNK) serdana Parlamena Herêma Kurdistanê kir û li gel Seroka Parlamenê û fraksiyonên li Parlamena Herêma Kurdistanê civiya.

Şandeya Kongreya Neteweyî ya Kurdistanê (KNK) serdana Parlamena Herêma Kurdistanê kir û li gel Seroka Parlamenê û fraksiyonên li Parlamena Herêma Kurdistanê civiya.

Şandeya Kongreya Neteweyî ya Kurdistanê (KNK) bi serokatiya Hevseroka KNK’ê Zeyneb Muradî doh çû serdana Parlamena Herêma Kurdistanê. Şandeyê destpêkê hevdîtin li gel Seroka Parlamena Herêma Kurdistanê Rêwaz Fayeq kir.

Seroka Parlamena Herêma Kurdistanê Rêwaz Fayeq kêfxweşiya xwe ji bo serdana şandeyê nîşan da û destnîşan kir ku divê Parlamena Herêma Kurdistanê bibe navenda biryardayîna gelê Kurd û piştgiriya tevgera beşên din ên Kurdistanê bike.

Rêwaz Fayeq di heman demê de qala astengî û pirsgirêkên îro yên li Parlamenê kir û diyar kir ku ji bo derbaskirina vê rewşê, divê lihevkirineke nîştimanî pêk were.

Her wiha Hevseroka Kongreya Neteweyî ya Kurdistanê (KNK) Zeyneb Muradî jî da zanîn ku Parlamen berhema têkoşîn û fedekariya gelê Kurd a gelek salan e û divê weke destketiyeke gelê Kurd bê parastin: “Divê Parlamento bi rola xwe ya bingehîn rabe û di vê pêvajoya xurtkirina demokrasiya li Kurdistanê de bi awayekî çalak xwedî li têkoşîna beşên din yên Kurdistanê derkeve.”

Di heman demê de şandeya KNK’ê serdana fraksiyonên Tevgera Goran, Yekîtiya Nîştimaniya Kurdistanê (YNK), Tevgera Nifşê Nû, Komela Dadgerî ya Kurdistanê û Yekgirtûya Îslamiya Kurdistanê kir. Şande ji aliyê endam û serokên fraksiyonan ve hate pêşwazîkirin.

Di hevdîtina li gel fraksiyonan de qala karê hevbeş û peywendiyên di navbera KNK û fraksiyonan de hate kirin.

Hemû fraksiyonan amadebûna xwe ji bo her karekî ji bo xizmeta doza rewa ya gelê Kurd û yekrêziya neteweyî nîşan dan.

ROJNEWS / HEWLÊR