KCK: Ti hikmê dadgeha qirker nîne

• Hevseroktiya Konseya Rêveber a KCK’ê Doza Kobanê weke ‘dozeke siyasî, qirkirinê’ bi nav kir û got,’’Dadgeha ku ev biryar daye dadgeha qirkirinê ye. Doza Kûmpasê ya Kobanê di çavê gelê Kurd û civaka Tirkiyê û raya giştî ya Tirkiyê de ti meşrûiyeta wê nîne û dozeke hatiye mehkûmkirin e.’’

Hevserokatiya Konseya Rêveber a KCK'ê piştî rûniştina biryarê ya Doza Kûmpasê ya Kobanê daxuyaniyek da, cezayên hatin birîn şermezar kir û diyar kir ku biryar rastiya AKP'ê nîşan dide. KCK'ê got, "Bi Doza Kûmpasê ya Kobanê re girîngiya têkoşînê careke din eşkere bûye. Geşkirina têkoşînê bi piştevanî û yekîtiyê ji bo hêzên demokrasiyê û siyaseta demokratîk pêwîstiyeke bivênevê ye."

Ti hikmê biryara qirker nîne
Daxuyaniya KCK'ê bi vî rengî ye: "Doza Kûmpasê ya Kobanê ku parçeyek ji polîtîkayên qirkirina Kurdan e û bi armanca tasfiyekirina siyaseta demokratîk hatibû vekirin, cezayên giran li dehan rêveber, endam û siyasetmedarên HDP'ê birîn. Desthilata faşîst a AKP-MHP’ê mohra xwe li binê biryara skandal da, ku bi biryarê re mafdar hatin mehkûmkirin, sûcdar bê ceza hatin hiştin û dîrok hat berovajîkirin. Ev doza ku diyardeya herî zelal a zîhniyeta dij-Kurd e, tu eleqeya wê bi hiqûqê re nîne. Weke ku di raya giştî de tê gotin, ev kûmpas ji aliyê desthilatdariya faşîst a AKP-MHP’ê ve hatiye pêşxistin. Doza Kûmpasê ya Kobanê bi temamî dozeke siyasî ye, dozeke qirkirinê ye. Dadgeha ku ev biryar daye dadgeha qirkirinê ye. Doza Kûmpasê ya Kobanê di çavê gelê Kurd û civaka Tirkiyê û raya giştî ya Tirkiyê de ti meşrûiyeta wê nîne û dozeke hatiye mehkûmkirin e.

Ji bo tasfiyekirina siyaseta demokratîk
Desthilatdariya faşîst a AKP-MHP’ê ji bo siyaseta demokratîk bêdeng û tasfiye bike, çareseriya pirsgirêka Kurd a li ser esasê demokratîkbûna Tirkiyeyê asteng bike ev doz vekir. Biryara dadgehê ji bo vê yekê ye. Ev doz jî di warê eşkerekirina têkiliya xurt a di navbera nêzîkatiya gelê Kurd û pirsgirêka Kurd û nêzîkatiya demokrasiyê de pir girîng e. Xala ku AKP-MHP’ê ku di qirkirina Kurdan de israr dike, Tirkiye gihandiye asteke ku li ser navê hiqûq, edalet û edaletê tiştek nehiştiye, dewlet bi temamî ji aliyê çete, mafya û mêtingeran ve hatiye serdestkirin û civak di nava feqîriyeke mezin de hiştiye. Her roj eşkere dibe dibe ku  ev yek rêveçûn wê bi wêraniyeke mezin re rû bi rû bimîne û wê her kes di binê vê de bîmîne. Ji ber vê yekê encama herî bingehîn a ku ji vê rewşê tê derxistin ew e ku her kesê alîgirê demokrasî, azadî û pergala demokratîk e, divê di çarçoveya demokratîkbûna Tirkiyeyê û çareseriya demokratîk a pirsgirêka Kurd de hêzên xwe bigihîne hev. Her kesên ku dixwaze piştgiriyê bide demokrasî û siberoja Tirkiyeyê divê vê yekê esas bigire. Ne pêkan e ku bi dûrketin an jî ne hatina vê yekê rolek erênî bilîze.

Giringiya têkoşînê aşkere bûye
Bi Doza Kûmpasê ya Kobanê re girîngiya têkoşînê careke din eşkere bûye. Geşkirina têkoşînê bi piştevanî û yekîtiyê ji bo hêzên demokrasiyê û siyaseta demokratîk pêwîstiyeke bivênevê ye. Bingeha demokratîk bi îmha û derbaskirina faşîzmê pêkan dibe. Ev yek bi têkoşîna yekbûyî ya hêzên demokratîk ên şoreşger pêkan e. Di vê pêvajoyê de encama bingehîn a ku divê em jê derxin ev e. Li Tirkiyeyê her hêzek ku xwe weke muxalefet pênase bike û bi cih bike, divê nebe xwedî helwestên ku polîtîkayên AKP-MHP’ê rewa bike. Desthilatdariya faşîst a AKP-MHP’ê bi gelê Kurd, gelên Tirkiyeyê, pêşeroja civakê, demokrasî, azadî û hiqûqê re di nava şer de ye. Gotinên nermbûnê xapandinek e. 

Doza Kobanê rastiya AKP’ê danî
Biryarên di Doza Kûmpasê ya Kobanê de hatin girtin rastiya AKP’ê derxist holê. Di heman demê de nêzîkatiya li hemberî Kurdan û siyaseta demokratîk a Tirkiyeyê û demokrasiyê ye jî. Di navbera herduyan de têkiliyek ji hev qut nabe heye. Divê her kes bi vê zanînê tevbigere, têkoşînê esas bigire û berfireh bike."